لاہور نیب آفس میں کھلی کچہری کا انعقاد،تین سوسے زائد متاثرین نے دادرسی کیلئے شرکت کی

لاہور (اُردو پوائنٹ اخبارتازہ ترین - اے پی پی۔ 26 اپریل2024ء) لاہور نیب آفس میں جمعہ کے روز ماہانہ کھلی کچہری کا انعقاد ہوا۔ ترجمان کے مطابق کھلی کچہری میں 350 سے زائد متاثرین نے دادرسی کیلئے شرکت کی، ڈی جی نیب لاہور امجد مجید اولکھ نے تمام متاثرین کو ازخود سنا اور موقع پر ہی مناسب ہدایات دیں، کھلی کچہری میں پرائم زون،پام وسٹہ ہائوسنگ، الرحمن گارڈن، خیابان امین ہائوسنگ سوسائٹی، لاثانی چکس ، الجلیل گارڈن، الکبیر ٹائون اور گرینڈ ایونیو ہائوسنگ کے متاثرین نے شرکت کی۔

اس موقع پر ڈی جی نیب کا کہنا تھا کہ نیب لاہور نے پرائم زون انتظامیہ کیخلاف اہم کارروائی کرتے ہوئے ملزمان کی منقولہ وغیر منقولہ جائیدادیں منجمند کردی ہیں، پرائم زون مالکان کی 300 کنال اراضی کو فریز کردیا گیا اور کیس فاسٹ ٹریک پر عدالتی چالان کی تکمیل کیلئے چلایا جا رہا ہے۔

(جاری ہے)

نیب ٹیمیں ملزمان کی گرفتاری اور عدالتی چالان مکمل کرنے کیلئے تیزی سے کام جاری رکھے ہوئے ہیں۔

پرائم زون کیس میں 1400 متاثرین کے کلیم کی تصدیق مکمل جبکہ دیگر کلیمز تصدیق کے مراحل میں ہیں۔ اسی طرح خیابان امین سوسائٹی کے لے آئوٹ پلان کی منظوری اور سوسائٹی کی ڈویلپمنٹ کی ذمہ داری ایل ڈی اے کو سونپ دی گئی ہے۔ سوسائٹی مالکان کی قیمتی جائیدادیں نیب نے ضبط کرلیں جن کی فروخت سے سوسائٹی کی ڈویلپمنٹ تکمیل کی جائیگی،نیب کی معلومات کے مطابق سوسائٹی انتظامیہ نے مجموعی طور پر7 ہزارمتاثرین سے فراڈ کیا تاہم نیب کو تاحال کلیمز کی موصولی کا سلسلہ جاری ہے۔

اسی طرح الرحمن گارڈن انتظامیہ کیخلاف برق رفتاری سے اقدامات اٹھاتے ہوئے ملزمان کے تمام اثاثہ جات اور سوسائٹی اراضی کو ضبط کر لیا گیا ہے،الرحمن گارڈن انتظامیہ کیخلاف نیب لاہور کیجانب سے سخت تادیبی کارروائی بھی متوقع ہے۔ پام وسٹہ سوسائٹی کیخلاف سخت اقدامات اٹھائے گئے ہیں، سوسائٹی کی مکمل اراضی ضبط کرلی گئی،ملزمان کی منقولہ و غیرمنقولہ جائیدادیں بھی ضبط تاہم دیگر اثاثہ جات کی تلاش جاری ہے جبکہ لاثانی چکس مالکان کیخلاف نیب لاہور کا ریفرنس احتساب عدالت میں زیر ٹرائل ہے،لاثانی چکس کے اشتہاری قرار دیئے گئے ملزمان کے ریڈ وارنٹ جاری کروانے کی کارروائی کا آغاز بھی ہو چکاہے، ملزمان کو بیرون ملک سے واپس لایا جائے گا۔

اسی طرح الجلیل گارڈن، الکبیر ٹائون اور گرینڈ ایونیو متاثرین کو موقع پر پلاٹوں کی ملکیت کے حوالہ سے ڈی جی نیب نے ضلعی انتظامیہ کو ہدایات جاری کیں،شکایت کنندگان کو مکمل واجبات ادائیگی کی صورت میں فوری قبضہ اور پلاٹ کی ملکیت فراہم کرنے کے احکامات ضلعی انتظامیہ کو جاری کر دیئے ہیں۔ متاثرین نے چیئرمین نیب کے اوپن ڈور ہیئرنگ اقدام کو بھرپور سراہا،ترجمان کے مطابق نیب لاہور ہر ماہ کے آخری جمعہ کھلی کچہری کا انعقاد کرتا ہے جس میں ڈی جی نیب لاہور متاثرین کو خود سنتے ہیں،کھلی کچہری کا انعقاد متاثرین اور نیب میں فاصلے کم کرنے کی ایک کاوش ہے۔