غیر معیاری گیس سلنڈر کے استعمال پر کریک ڈائون جاری

لاہور (اُردو پوائنٹ اخبارتازہ ترین - این این آئی۔ 16 مئی2024ء) صوبائی دارالحکومت لاہور میں غیر معیاری گیس سلنڈر استعمال کرنے والی گاڑیوں،رکشوں کے خلاف کریک ڈائون جاری ہے ،دو ہفتوں میں 04 ہزار سے زائد رکشوں اور پبلک ٹرانسپورٹ کیخلاف کارروائی کی گئی۔ چیف ٹریفک آفیسر لاہور عمارہ اطہر نے بتایا کہ انسانی جانوں کے جان و مال کے تحفظ کے پیش نظر غیر معیاری گیس سلنڈر استعمال کرنے والی گاڑیوں،رکشوں کیخلاف کارروائی جاری ہے ۔

دو ہفتوں میں 04ہزار سے زائد رکشوں اور پبلک ٹرانسپورٹ کیخلاف کارروائی کی گئی، کارروائی سے قبل غیر معیاری سلنڈر استعمال کرنے والی گاڑی مالکان، ڈرائیورز کو متعدد بار آگاہی دی گئی ۔ گورنمنٹ سے منظور شدہ گاڑیوں میں ہی سلنڈرز لگانے کی اجازت ہے۔

(جاری ہے)

سی ٹی او لاہور نے کمرشل گاڑیوں میں مختص کردہ اور مقررہ سلنڈر سے زائد لگانے پر بھی کارروائی کا حکم دیتے ہوئے کہا کہ گیس سلنڈر استعمال کرنے والی کمرشل گاڑیوں میں فائرفائٹنگ سلنڈرز کا ہونا بھی لازمی ہوگا۔

انہوں نے ہدایت کی کہ غیر معیاری سلنڈر لگانے والی گاڑیوں کو کارروائی کیساتھ ساتھ آگاہی دی جائے، روڈ سیفٹی یونٹ بس اڈاوں، ٹیکسی، پارکنگ اسٹینڈز پر خصوصی لیکچرز در رہیں ہیں۔شہریوں کے محفوظ سفر کو ہر ممکن یقینی بنایا جائے گا ، ماضی میں گاڑہوں میں غیر معیاری سلنڈروں کیوجہ سے بیشتر قیمتی جانیں لقمہ اجل بنیں، شہری سیفٹی کیلئے سلنڈر سے چلنے والی کمرشل گاڑیوں میں سفر کرنے سے گریز کریں۔