ی*صارفین بجلی کی شکایات کے فوری ازالے کے لئے لیسکوہیڈ کوارٹر میں ای- کچہری کا انعقاد

۳ لاہور (اُردو پوائنٹ اخبارتازہ ترین - آن لائن۔ 16 مئی2024ء) چیف ایگزیکٹو انجینئرشاہد حیدرکی زیرِصدارت آج لیسکو ہیڈکوارٹر میں ای کچہری کا انعقاد کیا گیا جس میں فیس بک کے لائیو سیشن کے ذریعے صارفین کی شکایات سٴْنیں اور شکایات کے فی الفور ازالے کے لئے موقع پر ہی احکامات جاری کئے گئے۔ لیسکو کی خصوصی ای کچہری میں چیف ایگزیکٹو لیسکو انجینئر شاہد حیدر کے علاوہ ڈی جی امپلیمنٹیشن طارق عثمان، چیف انجینئر پلاننگ عمران محمود، منیجر کوآپریٹ اکاؤنٹس محمدجاوید،منیجر ایس اینڈ آئی عباس علی،ڈپٹی منیجر کمپلینٹ سیل رانا رضوان صبغت اللہ موجود تھے جبکہ لیسکو کے تمام سرکلز کے ایس ایز نے بھی فیس بک لنک کے ذریعے شرکت کی۔

لیسکو کی جانب سے منعقد کی جانے والی ای کچہری میں ریجن ٍکے تمام سرکلز کے صارفین بھی اپنے مسائل کے بروقت حل کے لئے بھرپور شرکت کرتے ہیں۔

(جاری ہے)

چیف ایگزیکٹو انجینئر شاہد حیدر نے ای کچہری میں موصول ہونے والی شکایات پر متعلقہ افسران کو فی الفور ہدایات جاری کئیں۔ لیسکو چیف نے تمام سرکل سربراہان کو ہدایات جاری کیں کہ سیفٹی ہیزرڈ بننے والی تاروں کو فوری تبدیل کیا جائے اور اس بات کو یقینی بنا یا جائے کہ صارفین کو ان کی ریڈنگ کے مطابق بل جاری ہوں اور صارفین کی شکایات کے ازالے کو مکمل طور پر یقینی بنایا جائے۔

انہوں نے صارفین سے بھی درخواست کی کہ بجلی کی بلا تعطل سپلائی کو یقینی بنانے کے لئے اپنے بجلی بلوں کی بروقت ادائیگی کریں۔ واضح رہے کہ ہر ماہ لیسکو چیف اپنی ٹیم کے ہمراہ فیس بک پیج LESCO PMDU کے ذریعے عوام کی شکایات وصول کرتے ہیں جن کے فی الفور ازالے کو ہر ممکن طور پر یقینی بنایا جاتا ہے۔