وزیر اعلی پنجاب کی ہدایت پر شہر کی ہر گلی محلے کو چمکانے کیلئے زیرو ویسٹ مہم کا آغاز کر دیا گیا، ترجمان ایل ڈبلیو ایم سی

لاہور (اُردو پوائنٹ اخبارتازہ ترین - اے پی پی۔ 17 مئی2024ء) وزیر اعلی پنجاب مریم نوازکی ہدایت پر لاہور کی ہر گلی محلے کو چمکانے کے لیے لاہور ویسٹ مینجمنٹ کمپنی کی جانب سے 15 روزہ زیرو ویسٹ مہم کا آغاز کر دیا گیا۔ اس سلسلہ میں ایل ڈبلیو ایم سی زیرو ویسٹ مہم کی افتتاحی تقریب منعقد ہوئی جس میں ایکٹنگ چیئرمین ملک بلال ذوالفقار کھوکھر سمیت سیاسی اور سماجی رہنمائوں نے بڑی تعداد میں شرکت کی۔

تقریب میں سیاسی رہنمائوں اوریوسی چیئرمین کی جانب سے سی ای او ایل ڈبلیو ایم سی اور چیئرمین ایل ڈبلیو ایم سی کا پرتپاک استقبال کیا گیا۔سی ای او ایل ڈبلیو ایم سی بابر دین نے صوفی آباد اور نشتر ٹائون میں زیرو ویسٹ مہم کا افتتاح کرتے ہوئے آگاہ کیا کہ 15 روزہ مہم کے دوران لاہور کے 9 ٹائونز کو مرحلہ وار زیرو ویسٹ کیا جائے گا۔

(جاری ہے)

پہلے مرحلے میں نشتر ٹائون و عزیز بھٹی ٹائون میں خصوصی صفائی ایکٹیویٹیزکی جائیں گی اورروزانہ 5 ہزار سے زائد کنٹینرز کلیئرنس کے ساتھ ساتھ گلی محلوں کی مینوئل سویپنگ پر خصوصی توجہ دی جائے گی۔

ترجمان ایل ڈبلیو ایم سی نے بتایا کہ خصوصی مہم کے دوران 500 سے زائد اوپن پلاٹس کو زیرو ویسٹ کرنے کے ساتھ ساتھ سموگ کے پیش نظر سڑکوں کی سکریپنگ کا عمل بھی مکمل کیا جائے گا،رات کی شفٹ کے ساتھ ساتھ دن کی شفٹ میں بھی مکینیکل سویپنگ اور واشنگ کا عمل جاری رکھا جائے گا۔ اسی طرح مون سون کے پیش نظر لاہور بھر میں گلی گریٹنگ کا آغاز کر دیا گیا اور عوامی آگاہی کیلئے بڑے پیمانے پر مہم کا آغاز کرتے ہوئے آگاہی کیمپس، ڈور ٹو ڈور کمپین اور محلوں کی سطح پر اعلانات کا سلسلہ بھی جاری ہے، شہریوں سے بھی گزارش ہے کہ وہ لاہور کو صاف بنانے میں اپنا کردار ادا کریں، کوڑا صرف کوڑے دان میں پھینکیں اور غیر قانونی ڈمپنگ سے گریز کریں۔