ساہیوال میں بزنس فسیلیٹیشن سینٹر بنایا جائے گا‘شافع حسین کی ایوان صنعت و تجارت ساہیوال کے وفد سے گفتگو

لاہور (اُردو پوائنٹ اخبارتازہ ترین - این این آئی۔ 17 مئی2024ء) صوبائی وزیر صنعت و تجارت چوہدری شافع حسین سے ایوان صنعت و تجارت ساہیوال کے صدر کاشف ریاض کی قیادت میں وفد نے ملاقات کی۔محکمہ صنعت و تجارت کے کمیٹی روم میں ہونے والی ملاقات میں انڈسٹری کے مسائل اور سمال انڈسٹریل اسٹیٹ ساہیوال میں منسوخ پلاٹوں کی بحالی اور دیگر ایشوز پر بات چیت ہوئی۔

منسوخ پلاٹوں کے مسئلے کے حل کیلئے محکمہ صنعت و تجارت کے افسران اور چیمبر کے نمائندوں پر مشتمل کمیٹی تشکیل دے دی گئی اورکمیٹی مل بیٹھ کر مسئلے کا حل نکالے گی۔صوبائی وزیر صنعت و تجارت چوہدری شافع حسین نے کہا ہے کہ انڈسٹری اور صنعتکاروں کے مسائل ترجیحی بنیادوں پر حل کئے جائیں گے۔صنعتکاروں کی سہولت کیلئے ساہیوال میں بزنس فسیلیٹیشن سینٹر بنایا جائے گا۔

(جاری ہے)

ایشیائی ترقیاتی بینک کے تعاون سے ٹیوٹا کے 20 کالجوں کو سینٹرز آف ایکسیلنس بنایا جائے گا۔کالجوں اور ان کی لیبزکو عالمی معیار کے مطابق اپ گریڈ کیا جائے گا اور اس منصوبے پر 23ارب روپے لاگت آئے گی۔ان سینٹرز آف ایکسیلنس میں عالمی معیار کے کورسز متعارف کرائے جائیں گے۔ صوبائی وزیر نے کہا کہ ساہیوال میں ٹیوٹا کے ادارے کو بھی اپ گریڈ کیا جائے گا۔سیکرٹری صنعت و تجارت احسان بھٹہ،چیئرمین پیڈمک،ایڈیشنل سیکرٹری کامرس،ایم ڈی پیسک،سینئر اکنامک ایڈوائزر اور متعلقہ افسران نے اجلاس میں شرکت کی۔