پنجاب فوڈ اتھارٹی کی کارروائیاں، 5100لٹر ملاوٹی دودھ، 800کلو بیمار مرغیاں، ناقص آئل اور بھاری مقدار میں ممنوعہ زائد المیعاد اشیا تلف

لاہور (اُردو پوائنٹ اخبارتازہ ترین - اے پی پی۔ 17 مئی2024ء) پنجاب فوڈاتھارٹی نے 1544 فوڈ پوائنٹس کی چیکنگ کے دوران 4مقدمات درج کروا دیے ۔وزیر اعلیٰ پنجاب کی ہدایت پر ڈی جی فوڈ اتھارٹی کے فیلڈ آپریشن میں جعلسازی میں ملوث یونٹ دھر لیے گئے۔ تفصیلات کے مطابق لاہور زون میں 1544 فوڈ پوائنٹس کی چیکنگ کی گئی۔5یونٹس کی پروڈکشن بند کر کے خلاف ورزیوں پر 15لاکھ روپے سے زائد کے جرمانے عائد کیے گئے۔

کارروائیوں کے دوران 5100لٹر ملاوٹی دودھ، 800کلو بیمار مرغیاں، ناقص آئل اور بھاری مقدار میں ممنوعہ زائد المیعاد اشیا تلف کر دی گئیں۔ملک پروسیسنگ یونٹ میں پاوڈر، فرمالین اور چینی کی ملاوٹ سے جعلی دودھ تیار کیا جارہا تھا۔ ڈی جی فوڈ اتھارٹی کے مطابق مضر صحت دودھ کو مختلف برانڈز کی پیکنگ لگا کر فروخت کے لیے تیار کیا جارہا تھا جبکہ ٹولنٹن مارکیٹ سپلائی کے لیے آنے والی موذی بیماری زدہ مرغیاں بھی پکڑ لی گئیں۔

(جاری ہے)

ڈی جی فوڈ اتھارٹی نے کہا کہ معروف فوڈ پوائنٹس میں صفائی کے ناقص انتظامات، جالے لگی دیواریں اور زنگ آلود برتنوں کے استعمال پر کارروائیاں عمل میں لائی گئیں۔مضر صحت آئل، کھلے مصالحہ جات اور ممنوعہ اجزا کی ملاوٹ سے کھانے تیار کیے جارہے تھے۔ پکڑے جانے والا ملاوٹی دودھ اور بیمار گوشت کہاں کہاں سپلائی ہونا تھا؟ ویجیلنس ٹیم کو ٹاسک تفویض کر دیا گیا۔ ڈی جی فوڈ اتھارٹی نے کہا کہ ملاوٹی دودھ اور ناقص گوشت خریدنے والے فوڈ پوائنٹس کے خلاف سخت کارروائی عمل میں لائی جائے گی۔