د*لاہور الیکٹرک سپلائی کمپنی کی جانب سے بجلی چوروں کے خلاف آپریشن جاری

$لاہور (اُردو پوائنٹ اخبارتازہ ترین - آن لائن۔ 17 مئی2024ء) وزارت توانائی پاور ڈویڑن کی ہدایت کے مطابق چیف ایگزیکٹو لیسکو انجینئر شاہد حیدر کی زیر نگرانی انسداد بجلی چوری مہم کامیابی کے ساتھ جاری ہے۔انسداد بجلی چوری مہم کو237روز مکمل ہوگئے ہیں، اس دوران کل81ہزار1سو1 ملزمان بجلی چوری میں ملوث پائے گئے،75 ہزار2 سو6 ملزمان کیخلاف مقدمات درج کروا کر32 ہزار54 ملزمان کو گرفتار کرلیا گیا۔

بجلی چوروں کو اب تک 9 کروڑ57 لاکھ 43 ہزار3 سو94 یونٹس چارج کئے گئے ہیں جن کی مالیت 3ارب50 کروڑ38 لاکھ57 ہزار4سو80 روپے ہے۔گزشتہ 24 گھنٹوں کے دوران ریجن بھر میں 52 ملزمان کو بجلی چوری کرتے ہوئے گرفتار کرلیا، مجموعی طور پر417ملزمان بجلی چوری میں ملوث پائے گئے، جن میں سی144 کے خلاف مقدمات درج ہوچکے ہیں۔

(جاری ہے)

پکڑے جانے والے کنکشنز میں 23کمرشل،3 زرعی اور391 ڈومیسٹک تھے۔

تمام کنکشنز منقطع کرکے ان کو3 لاکھ90 ہزار3سو87یونٹس ڈٹیکشن بل کی مد میں چارج کئے گئے ہیں جن کی مالیت92 لاکھ4 ہزار8 سو62 روپے ہے۔ بجلی چوروں کیخلاف کئے جانے والے آپریشن میں بڑے کمرشل صارفین بھی بجلی چوری میں ملوث پائے گئے۔ ان تمام کے کنکشنز بھی منقطع کئے گئے اوران کو ڈٹیکشن یونٹس چارج کئے گئے۔حویلی کے علاقے میں کنکشن کو2لاکھ 79 ہزار روپے،گوالمنڈی کے علاقے میں کنکشن کو2لاکھ،شاہدرہ کے علاقے میں کنکشن کو2لاکھ روپے اورراوی کلفٹن کے علاقے میں ملزم کو2لاکھ روپے کی رقم چارج کی گئی ہے۔

واضح رہے بجلی چوروں کیخلاف آپریشنز وفاقی پاور ڈویڑن کی جانب سے دی گئی ہدایات کے مطابق کیئے جا رہے ہیں اور چیف ایگزیکٹو انجینئر شاہد حیدر بذاتِ خود ان آپریشنز کی نگرانی کر رہے ہیں۔ لیسکو چیف کا کہنا ہے کہ بجلی چوری کے مکمل خاتمے تک بلا تفریق گرینڈ آپریشن جاری رہے گا۔ آپریشن کے دوران بجلی چوروں کے ساتھ ساتھ ان کی سرپرستی کرنیوالے لیسکو افسران و ملازمین کو بھی قانون کے کٹہرے میں لایا جائے گا۔