صوبائی وزیر صنعت و تجارت چوہدری شافع حسین کی زیر صدارت میں پرائس کنٹرول کونسل کا دوسرا اجلاس

لاہور (اُردو پوائنٹ اخبارتازہ ترین - آن لائن۔ 22 مئی2024ء) صوبائی وزیر صنعت و تجارت چوہدری شافع حسین کی زیر صدارت سول سیکرٹریٹ میں پرائس کنٹرول کونسل کا دوسرا اجلاس منعقد ہوا۔کونسل نے سیکریٹری خوراک اور سیکرٹری زراعت پر مشتمل اپیلیٹ کمیٹی تشکیل دے دی۔کمیٹی پروڈیوسر، ڈیلر، امپورٹر، سیلر کے خلاف کارروائی کے حوالے سے آن کی اپیلوں کی سماعت کرے گی۔

کونسل نے ڈسٹرکٹ پرائس کنٹرول کمیٹیوں کی کمپوزیشن کی بھی منظوری دی۔ڈپٹی کمشنر پرائس کنٹرول کمیٹی کا چیئر پرسن جبکہ سرکاری افسران اور ایسوسی ایشنوں کے نمائندے ممبران ہوں گے۔ڈسٹرکٹ پرائس کنٹرول کمیٹیاں اشیاء ضروریہ کی دستیابی،سپلائی اور قیمتوں پر نظر رکھیں گی۔پرائس کنٹرول مجسٹریٹس کی کارکردگی بھی مانیٹر کریں گی۔

(جاری ہے)

قیمتوں کے تعین میں ڈسٹرکٹ کنٹرولر کی معاونت کریں گی۔

ڈپٹی کمشنرز کو ایک ہفتے کے اندرکمیٹیاں تشکیل دینے کی ہدایت کی گئی۔کونسل نے ریت کے ساتھ سینڈسٹون،سلٹ سٹون،سلیٹ سٹون اور گریول کو اشیاء ضروریہ کے شیڈول میں شامل کرنے کی بھی اجازت دی۔صوبائی وزیر صنعت کو قیمت پنجاب ایپ کی ورکنگ بارے تفصیلی بریفنگ دی گئی۔صوبائی وزیر صنعت و تجارت چوہدری شافع حسین نے اجلاس سے خطاب کرتے ہوئے کہاکہ اشیاء ضروریہ کی قیمتوں میں مسلسل کمی کا رجحان ہے، حکومتی کاوشوں کی بدولت قیمتوں میں استحکام آیا ہے۔

عوام کو اشیاء ضروریہ کی مقررہ نرخوں پر فراہمی یقینی بنانے کیلئے متعلقہ ادارے متحرک رہیں،غفلت اور کوتاہی کی کوئی گنجائش نہیں۔چوہدری شافع حسین نے کہاکہ منڈیوں میں نیلامی کے عمل کی مانیٹرنگ کا مستقل لائحہ عمل ضروری ہے اس حوالے سے جدید ٹیکنالوجی سے استفادہ کیا جائے۔صوبائی وزیر صنعت نے کہاکہ پرائس کنٹرول کے حوالے سے مڈل مین کے کردار کو محدود کرنا ضروری ہے۔پرائس کنٹرول ایک چیلنج ہے تاہم اس سے نمٹنے کیلئے مربوط کاوشیں کرنا ہوں گی۔سیکرٹری خوراک، سیکرٹری لائیو سٹاک، سپیشل سیکرٹری زراعت،ڈی جی انڈسٹریز اور متعلقہ محکموں کے افسران نے اجلاس میں شرکت کی۔