تحریک منہاج القرآن کے وفد کی ڈائریکٹر جنرل پنجاب انسٹیٹیوٹ لینگوئج آرٹ اینڈ کلچر سے ملاقات

لاہور (اُردو پوائنٹ اخبارتازہ ترین - اے پی پی۔ 24 مئی2024ء) تحریک منہاج القرآن شعبہ پبلک ریلیشنز کے ڈائریکٹر شہزاد رسول چوہدری کی قیادت میں وفد نے پنجاب انسٹی ٹیوٹ لینگوئج آرٹ اینڈ کلچر کی ڈائریکٹر جنرل بینش فاطمہ ساہی سے ان کے دفتر میں ملاقات کی۔اس موقع پر ڈائریکٹر پلاک ڈاکٹر خاقان حیدر غازی بھی موجود تھے۔وفد میں حاجی محمد اسحاق اور عبد الحفیظ چوہدری شامل تھے۔

تحریک منہاج القرآن کے رہنماوں نے ڈی جی پلاک کو شیخ الاسلام ڈاکٹر محمد طاہر القادری کی تصانیف اور چیئرمین سپریم کونسل منہاج القرآن انٹرنیشنل ڈاکٹر حسن محی الدین قادری کی شہرہ آفاق تصنیف دستور مدینہ اور فلاحی ریاست کا تصور کا تحفہ دیا۔منہاج القرآن کے وفد نے بینش فاطمہ ساہی کو منہاج القرآن سیکرٹریٹ اور منہاج یونیورسٹی لاہور کے دورہ کی دعوت دی۔

(جاری ہے)

ڈی جی پلاک نے دعوت قبول کرتے ہوئے جلد آنے کا وعدہ کیا۔وفد نے ڈی جی پلاک کو تحریک منہاج القرآن کے تعلیمی،فلاحی منصوبہ جات کے حوالے سے تفصیلی بریفنگ دی۔ پنجاب انسٹیٹیوٹ لینگوئج آرٹ اینڈ کلچر کی ڈائریکٹر جنرل بینش فاطمہ ساہی نے تحریک منہاج القرآن اور شیخ الاسلام ڈاکٹر محمد طاہر القادری کی علمی،تحقیقی خدمات کو سراہا۔انہوں نے کہا کہ پلاک پنجابی ادب سے منسلک ادیبوں،شاعروں،افسانہ نگاروں اور پنجاب کلچر کو پروان چڑھانے کیلئے اپنا کردار ادا کر رہا ہے۔پلاک پنجاب کلچر کو پروموٹ کرنے کیلئے شاعروں اور ادیبوں کو پلیٹ فارم مہیا کر رہا ہے۔پنجابی فن و ثقافت کی پوری دنیا میں الگ پہچان ہے۔