لیسکو کا بجلی چوروں کے خلاف آپریشن جاری، 32 ہزارسے زائدملزمان کو گرفتار کر کے بھاری جرمانے عائد کئے گئے،ترجمان

لاہور (اُردو پوائنٹ اخبارتازہ ترین - اے پی پی۔ 25 مئی2024ء) لاہور الیکٹرک سپلائی کمپنی کی جانب سے بجلی چوروں کے خلاف آپریشن جاری ہے، اب تک کی کارروائیوں میں 32 ہزار8سو31 ملزمان کو گرفتار کرکے بھاری جرمانے عائد کئے گئے ۔ترجمان کے مطابق وزارت توانائی پاور ڈویژن کی ہدایت کے مطابق چیف ایگزیکٹو لیسکو انجینئر شاہد حیدر کی زیر نگرانی انسداد بجلی چوری مہم کامیابی کے ساتھ جاری ہے۔

انسداد بجلی چوری مہم کو 244روز مکمل ہوگئے ہیں، اس دوران کل84 ہزار5سو61 ملزمان بجلی چوری میں ملوث پائے گئے،78 ہزار7 سو3 ملزمان کیخلاف مقدمات درج کروا کے 32 ہزار8سو71 ملزمان کو گرفتار کرلیا گیا۔ بجلی چوروں کو اب تک 9 کروڑ85 لاکھ 71 ہزار4 سو49 یونٹس چارج کئے گئے ہیں جن کی مالیت 3ارب 59 کروڑ51 لاکھ9 ہزار3سو26 روپے ہے۔

(جاری ہے)

گزشتہ 24 گھنٹوں کے دوران ریجن بھر میں 48 ملزمان کو بجلی چوری کرتے ہوئے گرفتار کرلیا گیا جبکہ مجموعی طور پر479 ملزمان بجلی چوری میں ملوث پائے گئے، جن میں سے170 کے خلاف مقدمات درج ہوچکے ہیں۔

پکڑے جانے والے کنکشنز میں 16 کمرشل،4 زرعی،1انڈسٹریل اور459 ڈومیسٹک تھے۔ تمام کنکشنز منقطع کرکے ان کو 3 لاکھ57 ہزار9سو16یونٹس ڈٹیکشن بل کی مد میں چارج کیا گیاہے جن کی مالیت1 کروڑ 14 لاکھ8 ہزار37 روپے ہے۔ بجلی چوروں کیخلاف کئے جانے والے آپریشن میں بڑے کمرشل صارفین بھی بجلی چوری میں ملوث پائے گئے۔ ان تمام کے کنکشنز بھی منقطع کئے گئے اوران کو ڈٹیکشن یونٹس چارج کئے گئے۔

شیخوپورہ روڈ کے علاقے میں کنکشن کو2لاکھ64ہزار روپے،شرقپور کے علاقے میں کنکشن کو 4لاکھ14ہزار روپے،برج اٹاری کے علاقے میں کنکشن کو2لاکھ68ہزار روپے اور کوٹ عبدالمالک کے علاقے میں ملزم کو2لاکھ روپے کی رقم چارج کی گئی ہے۔ درایں اثنا لیسکو چیف نے کہا ہے کہ بجلی چوری کے مکمل خاتمے تک بلا تفریق گرینڈ آپریشن جاری رہے گا۔ آپریشن کے دوران بجلی چوروں کے ساتھ ساتھ ان کی سرپرستی کرنیوالے لیسکو افسران و ملازمین کو بھی قانون کے کٹہرے میں لایا جائے گا۔