غیرقانونی کمرشلائزیشن اور لینڈ یوز کی خلاف ورزی پر بلا امتیاز کارروائیاں کی جائیں، ڈی جی ایل ڈی اے کی متعلقہ افسران کو ہدایت

لاہور (اُردو پوائنٹ اخبارتازہ ترین - اے پی پی۔ 25 مئی2024ء) ڈائریکٹر جنرل ایل ڈی اے طاہر فاروق کی زیر صدارت پلاننگ اینڈ ڈیزائن کمیٹی کا اجلاس منعقد ہوا جس میں پیش کردہ کیسز کا قوانین کے مطابق جائزہ لیا گیا۔اجلاس میں متعلقہ ڈائریکٹر ٹائون پلاننگ نے اپنے اپنے زون کے کیسز پیش کیے۔اجلاس میں تعلیمی ادارے، پٹرول پمپ، بحالی سنٹر، جم، انڈور سپورٹس و ہیلتھ فیسلیٹی سمیت دیگر کیسز کا جائزہ لیا گیا۔

(جاری ہے)

ڈی جی ایل ڈی اے نے کہا کہ اجلاس میں کیسز پیش کرنے سے قبل متعلقہ اداروں کے این او سیز یقینی بنائے جائیں،اسی طرح منظور شدہ کیسز کے لینڈ یوز پر سختی سے عملدرآمد یقینی بنایا جائے۔ انہوں نے ہدایت کی کہ ٹیپا پارکنگ قوانین کو مدنظر رکھتے ہوئے کیسز کا از سر نو جائزہ لے۔ طاہر فاروق نے کہا کہ غیر قانونی کمرشلائزیشن اور لینڈ یوز کی خلاف ورزی پر بلا امتیاز کارروائیاں کی جائیں،قوانین پر سختی سے عملدرآمد کرانے کے لیے لینڈ یوز قوانین میں بہتری لائیں گے۔

ڈی جی نے کہا کہ کاروباری افراد کی سہولت کے ساتھ ساتھ قوانین پر عملدرآمد انتہائی ضروری ہے۔اجلاس میں چیف میٹرو پولیٹن پلاننگ، چیف ٹائون پلانر ون، چیف ٹائون پلانر ٹو ، ٹیپا، واسا، ضلعی انتظامیہ اور ٹائون پلاننگ ونگ کے ڈائریکٹرز نے شرکت کی۔