ڈبل روٹی، رس اور بن کی قیمتوں میں خاطر خواہ کمی کی جائے،بلال یاسین

لاہور (اُردو پوائنٹ اخبارتازہ ترین - اے پی پی۔ 26 مئی2024ء) ڈبل روٹی، رس اور بن کی قیمتوں میں خاطر خواہ کمی کی جائے، 2 ماہ میں گندم، آٹے اور میدے کی قیمتوں میں 30 سے 48 فیصد تک کمی ہوئی ہے، روٹی اور نان کی قیمتوں میں کمی کروائی، بیکری مصنوعات کی قیمتیں بھی ہر صورت کم ہوں گی۔ ان خیالات کا اظہار وزیر خوراک نے بیکری آئٹمز کی قیمتوں میں کمی کیلئے اہم اجلاس کی صدارت کرتے ہوئے کیا۔

اجلاس میں سیکرٹری خوراک پنجاب، ڈی جی فوڈ اتھارٹی، ڈی جی انڈسٹریز اور ڈپٹی کمشنر لاہور شریک تھے۔ اہم اجلاس میں بیکری ایسوسی ایشن اور 21 مشہور برانڈز کے نمائندوں نے بھی شرکت کی۔ تفصیلات کے مطابق وزیر خوراک پنجاب بلال یاسین روٹی اور نان کی قیمتوں میں کمی کے بعد بیکری مصنوعات کی قیمتوں میں کمی کیلئے متحرک ہیں۔

(جاری ہے)

وزیر خوراک نے اسٹیک ہولڈرز کے اجلاس میں بیکری مصنوعات کی قیمتوں میں فوری کمی کیلئے تجاویز لیں۔

انہوں نے بتایا کہ بیکری مالکان کی درخواست پر انہیں آج سوموار تک قیمتوں میں رضاکارانہ کمی کا وقت دیا گیا ہے۔ بلال یاسین نے بیکری مالکان سے کہا کہ اپنی مصنوعات اور بسکٹ برانڈز کی قیمتوں میں رضاکارانہ طور پر کمی کریں۔ آج انتظامیہ کیساتھ بیٹھ کر بیکری آئٹمز کی قیمتوں میں کمی کا حتمی تعین ہوگا۔ وزیر خوراک نے بتایا کہ پنجاب بھر میں انتظامیہ کم قیمتوں پر بیکری مصنوعات کی دستیابی یقینی بنائے گی۔

انہوں نے کہا کہ گندم سے تیار ہونے والی 60 مصنوعات کی قیمتوں میں کمی ہونی چاہیے۔ وزیر خوراک پنجاب نے بتایا کہ عوام تک سستی اور معیاری خوراک کی فراہمی کیلئے ہر ممکن اقدامات اٹھا رہے ہیں اور عوام کے استعمال میں آنے والی بیکری مصنوعات کی قیمتوں میں ہر صورت خاطر خواہ کمی کروائیں گے۔