وائس چانسلر نے پنجاب یونیورسٹی لائبریری میں کوہا سافٹ ویئر سسٹم کا افتتاح کردیا

لاہور (اُردو پوائنٹ اخبارتازہ ترین - این این آئی۔ 31 جولائی2025ء)وائس چانسلر پروفیسر ڈاکٹر محمد علی نے پنجاب یونیورسٹی لائبریری میں نئے سافٹ ویئر’’کوہا انٹیگریٹڈ لائبریری مینجمنٹ سسٹم‘‘ کا افتتاح کردیا ۔ اس سلسلے میں افتتاحی تقریب کا انعقاد پنجاب یونیورسٹی لائبریری میںکیا گیا جس میں پرو وائس چانسلر پروفیسر ڈاکٹر خالد محمود، چیف لائبریرین ڈاکٹر محمد ہارون عثمانی،ڈی جی ایس ای ایس پروفیسر ڈاکٹر ریحان صادق، فیکلٹی ممبران اور لائبریرینز نے شرکت کی۔

تقریب سے خطاب کرتے ہوئے وائس چانسلر پروفیسر ڈاکٹر محمد علی نے اس اقدام کے پیچھے ٹیم کی تعریف کی اور تعلیمی منظر نامے میں لائبریریوں کی وسیع اہمیت پر زور دیا۔ انہوں نے کہا کہ نظام تعلیم کا مقصد تعلیم دینا ہوتا ہے اور لائبریریاں علم کی فراہمی کے لیے بنائی جاتی ہیں۔

(جاری ہے)

انہوں نے کہا کہ لائبریرین نہ صرف یونیورسٹیوں میں بلکہ معاشرے کی تشکیل میں بھی اہم کردار ادا کرتے ہیں۔

پروفیسر ڈاکٹر خالد محمود نے پنجاب یونیورسٹی لائبریری ٹیم کی محنت اور عزم کو سراہتے ہوئے نئے نظام کی ہموار اور موثر منتقلی کو یقینی بنانے میں ان کے کردار کا اعتراف کیا۔ڈاکٹر محمد ہارون عثمانی نے شرکاء کو پنجاب یونیورسٹی لائبریری کے ڈیجیٹل تبدیلی کے سفر بارے آگاہ کیا۔ انہوں نے کہا کہ لائبریری 2007 سے’’ایم ایل آئی ایم ایس‘‘ کے نام سے اندرون ملک تیار کردہ سافٹ ویئر پر کام کر رہی ہے۔

انہوں نے کہا کہ2023 میں لائبریری خدمات کی کارکردگی اور صارف دوستی کو بڑھانے کے لیے بین الاقوامی سطح پر تسلیم شدہ اوپن سورس سافٹ ویئر’کوہا 'KOHA' پر منتقل کرنے کا فیصلہ کیا گیا۔ انہوں نے کہا کہ پنجاب یونیورسٹی لائبریری میں پیشہ ور لائبریرین کی کاوشوں اور تکنیکی مہارت سے کوہاکو یونیورسٹی کی مخصوص ضروریات کو پورا کرنے کے لیے کامیابی سے انسٹال اور اپنی مرضی کے مطابق بنایا گیاہے ۔ انہوں نے کہا کہ لائبریری میں کوہا سسٹم باضابطہ افتتاح کے ساتھ جدیدیت کی طرف اپنے سفر میں ایک اہم سنگ میل ہے۔ یہ تقریب جدت، تعاون، اور مسلسل پیشہ ورانہ مہارت کے ذریعے یونیورسٹی کی لائبریری خدمات کو مزید مضبوط بنانے کے ایک نئے عزم کے ساتھ اختتام پذیر ہوئی۔