سانگلہ ہل موسم کی شدت اور ہیٹ سٹروک سے بچنے کیلئے احتیاطی تدابیر اختیار کی جائیں، ڈاکٹر طارق زمان

ننکانہ صاحب(اُردو پوائنٹ اخبارتازہ ترین - این این آئی۔ 18 مئی2024ء) تحصیل ہیڈ کوارٹر کے ڈپٹی میڈیکل سپرٹنڈنٹ ڈاکٹر طارق زمان کاہلوں نے کہا ہے کہ موسم کی شدت اور ہیٹ سٹروک سے بچنے کیلئے ضروری ہے کہ احتیاطی تدابیر اختیار کی جائیں،گرمی میں بیجا باہر نکلنے سے پرہیز کریں اگر ضرورت کے تحت باہر نکلنا پڑے تو کسی گیلے کپڑے یا تولیے سے سر ڈھانپ کر باہر نکلیں، باہر نکلتے وقت گہرے رنگ کے ملبوسات اور خاص طور پر سیاہ رنگ پہننے سے بھی گریز کریں، لسی اور دہی کا استعمال بڑھا دیں اور دن بھر میں کم از کم چار لیٹر پانی ضرور پئیں، نمکیات کی کمی پوری کرنے کیلئے او آر ایس کا استعمال کریں تاکہ جسم میں نمکیات اور پانی کی کمی با آسانی پوری ہو جائے،نیز سورج سے بچنے کیلئے چھتری کا استعمال ضرور کریں۔

(جاری ہے)

میڈیا سے گفتگو کرتے ہوئے انہوں نے کہا کہ ہیٹ اسٹروک کی علامات میں جلد خشک ہوجانا یا رنگت زرد یا سرخ ہونا، الجھن، چلنا مشکل ہونا، آنکھوں کی پتلیاں پھیل جانا، قے ہونا، غیرمعمولی یا نامناسب رویہ، دل کی دھڑکن تیز ہونا، سانس چڑھنا، بے ہوشی قابل ذکر ہیں،اکثر اوقات تیز بخار کے ساتھ بیہوشی بھی طاری ہو جاتی ہے جبکہ مسلز اکڑ جانا، شدید گرمی کے باوجود پسینہ نہ آنا،بہت زیادہ تھکاوٹ اور متلی بھی اس کی ابتدائی عام علامات ہیں،اگر یہ علامات نظر آئیں تو طبی امداد کیلئے فوری رجوع کرنا چاہیے۔