تعلیمی ادارے آرٹیفشل انٹلیجنس، کمپیوٹنگ اور دیگر ماڈرن ٹیکنالوجیز کی تعلیم پر زور دیں، وزیر سائنس وٹیکنالوجی خیبرپختونخوا

پشاور(اُردو پوائنٹ اخبارتازہ ترین - این این آئی۔ 30 اپریل2024ء) وزیراعلیٰ خیبر پختونخوا کے معاون خصوصی برائے سائنس ٹیکنالوجی و انفارمیشن ٹیکنالوجی خالد لطیف خان مروت نے کہا ہے کہ تعلیمی ادارے آرٹیفشل انٹلیجنس، کمپیوٹنگ اور دیگر ماڈرن ٹیکنالوجیز کی تعلیم پر زور دیں اور اس کے حوالے سے مختلف ڈگریز پروگرام بھی شروع کروائے جائیں تاکہ طلبہ کو ماڈرن ٹیکنالوجیز کی تعلیم سے آراستہ کیا جاسکے۔

ان خیالات کا اظہار انہوں نے یونیورسٹی آف انجنئیرنگ اینڈ ٹیکنالوجی پشاور میں انٹرنیشنل کانفرنس آن اینوویش آن کمپیوٹنگ ٹیکنالوجی اینڈ انفارمیشن سروسز 2024 (آئی سی ٹی آئی ایس '24)میں بحیثیت مہمان خصوصی خطاب کرتے ہوئے کیا۔معاون خصوصی نے کانفرنس میں ماڈرن انفارمیشن ٹیکنالوجی کے حوالے سے لگائے گئے مختلف اسٹالز کا دورہ کیا اور ٹیکنالوجی کے میدان میں طلبہ کی کاوشوں کو سراہا۔

(جاری ہے)

انہوں نے امید ظاہر کی کہ ٹیکنالوجی کے حوالے سے مزید ایسے سیمنار، کانفرنسز اور ورکشاپس منعقد کروائی جانے چاہئیں تاکہ ہمارے نوجوانوں میں ٹیکنالوجی کی مقبولیت میں اضافہ ہوسکے اور ہم دنیا کے ترقی یافتہ ممالک کی صف اول میں شریک ہوسکیں۔معاون خصوصی نے کہا کہ تعلیمی اداروں میں فری انٹرنیٹ کی سہولیات فراہم کرنے کیلئے صوبائی حکومت مختلف پروگرامز شروع کررہی ہے جس سے طلبہ کو ٹیکنالوجی کی تعلیم کے حصول میں کافی حدتک آسانی پیدا ہوگی۔

خالد لطیف خان مروت نے کہا کہ سائنس اینڈ ٹیکنالوجی کو پروان چڑھانے اور انہیں گراس روٹ لیول تک پہنچنے کیلئے تعلیمی ادارے جتنا کام کرینگے اس میں انہیں مکمل سپورٹ اور سہولیات فراہم کی جائیں گی۔کانفرنس میں ڈائریکٹر جنرل سائنس اینڈ ٹیکنالوجی سجاد حسین شاہ، کانفرنس چیئرمین لائق حسین، چیف آرگنائزر نصرمن اللہ اور دیگر اراکین نے شرکت کی۔تقریب کے اختتام پر معاون خصوصی نے ''وال آف فیم'' کا افتتاح بھی کیا ۔