اللہ تعالی نے ہماری رفاقت ایسے جماعت کے ساتھ رکھی ہے جن کے اکابرکن ہر دور میں طاغوتی قوتوں کے ساتھ عہدبرآ رہے ہیں، مو لا نا عبد الو سع

کوئٹہ (اُردو پوائنٹ اخبارتازہ ترین - این این آئی۔ 23 مئی2024ء) جمعیت علماء اسلام بلوچستان کے صوبائی امیر سینیٹر مولانا عبدالواسع نے جماعتی اراکین کے وفود سے بات چیت کرتے ہوئے کہا کہ اللہ تعالی نے ہماری رفاقت ایسے جماعت کے ساتھ رکھی ہے جن کے اکابرکن ہر دور میں طاغوتی قوتوں کے ساتھ عہدبرآ رہے ہیں ،قائد جمعیت مولانا فضل الرحمن صاحب کی متحرک قیادت اور دانشمندانہ حکمت عملی کے وجہ سے جمعیت علماء اسلام نہ صرف قومی سیاست کا محور سمجھا جاتا ہے بلکہ عالمی سیاست میں بھی اہم مقام ہے ۔

انہوں نے کہا کہ قائد جمعیت ہمیشہ آئینی اور جمہوری جدوجہد کے لئے متحرک رہیں ہے اس راستے کے ہر رکاوٹ کا دلیل منطق اور اولوالعزمی کے ساتھ مقابلہ کیا ہے۔جب تک صحیح معنوں میں جمہوری اقدار بحال نہیں ہوتی کوئی عہدہ اور منصب جمعیت علماء اسلام اپنے شایان شان نہیں سمجھتی ۔

(جاری ہے)

انہوں نے کہا کہ ہمارے جمہوری جدوجہد کے نتیجے میں کوئی جماعت اگر مصلحت کا شکار ہوکر ہمارے جمہوری جدوجہد کے ثمرات سے مستفید ہو رہا ہے تو یہ ہمارے لئے باعث اطمنان ہے ۔

جمعیت علماء اسلام اکیلے ہی اس جدوجہد کو یکسوئی کے ساتھ جاری رکھنے کی سکت رکھتی ہے۔ جمعیت علماء اسلام کے کارکنان جہد مسلسل اور مضبوط قوت ارادی کی وجہ سے وہ اس میدان کے کندن بن چکے ہیں اور کسی بھی حریف کے خلاف کامیابی کے جھنڈے گاڑ سکتے ہیں۔