کمشنر سرگودھا کازیر ِتعمیر47 پل اوورفلائی کے کام میں سست روی کا نوٹس

سرگودھا (اُردو پوائنٹ اخبارتازہ ترین - اے پی پی۔ 15 مئی2024ء) کمشنر محمد اجمل بھٹی نے زیر ِتعمیر47 پل اوورفلائی کے کام میں سست روی کا نوٹس لیتے ہوئے ٹھیکیدار، فیسکو، ہائی ویز، سوئی گیس او رکنٹونمنٹ بورڈ کے افسران کوطلب کر لیا ۔انہوں نے کام کی سست روی بارے استفسار کیا جس پر ٹھیکیدار نے بتایا کہ فیصل آباد الیکٹرک سپلائی کمپنی ( فیسکو) کی جانب سے کچھ پولز اور تاروں کی متبادل جگہ منتقلی، سوئی گیس کے 2 مین پائپ لائن کی تبدیلی کے علاوہ کنٹونمنٹ بورڈ کی سیور لائن کو متبادل جگہ پر منتقل نہ ہونے سے کام سست روی کا شکار ہے۔

(جاری ہے)

ایکسین ہائی ویز فرمان میکن نے بتایا کہ فیسکو، سوئی گیس اور کنٹونمنٹ بورڈ کو ادائیگیاں کی جاچکی ہیں جس پر کمشنر نے تینوں اداروں کو 10جون تک اپنا کام ہر صورت مکمل کرنے کی ہدایت کی۔ انہوں نے فیسکو حکام سے کہاکہ وہ شدید موسم میں شٹ ڈاؤن صبح 6 سے دس بجے تک کریں اور جلد از جلد کام کو مکمل کریں۔ انہوں نے کہاکہ آئندہ ہر ہفتہ اس ضمن میں اجلاس منعقد کر کے کام کی پیش رفت کا جائزہ لیاجائےگا۔ انہوں نے افسران پر زور دیا کہ وہ پل کے تعمیراتی کام کی وجہ سے شہریوں کو درپیش مشکلات کا احساس کریں اور انہیں ریلیف فراہم کرنے کےلئے تمام کام جلد مکمل کیاجائے۔