شاہ رخ خان نے 33سالہ فلمی کیریئر میں پہلا نیشنل ایوارڈ جیت لیا

ممبئی(اُردو پوائنٹ اخبارتازہ ترین - این این آئی۔ 02 اگست2025ء)بالی وڈ کے کنگ شاہ رخ خان نے اپنے 33سالہ فلمی کیریئر میں بالآخر پہلا نیشنل ایوارڈ جیت لیا۔شاہ رخ خان، جنہیں دنیا بھر میں 'کنگ آف بالی وڈ' کے طور پر جانا جاتا ہے نے 1992میں فلم 'دیوانا' سے اپنے فلمی سفر کا آغاز کیا اور جلد ہی وہ بھارت کے سب سے مقبول اداکاروں میں شمار ہونے لگے۔ انہوں نے اپنے فلمی کیریئر میں'دل والے دلہنیا لے جائیں گی'، 'چک دی!انڈیا'، 'کچھ کچھ ہوتا ہی'جیسی کئی مشہور فلموں میں اپنی شاندار اداکاری سے مداحوں کے دلوں پر راج کیا۔

شاہ رخ خان نے 33سالہ فلمی کیریئر میں کئی بڑے ایوارڈز بھی جیتے بلکہ انہیں دوسرے ملکوں کی جانب سے بھی کئی بین الاقوامی اعزازات سے نوازا گیا ،لیکن وہ ایک بار بھی بھارت کے نیشنل ایوارڈ کو جیتنے میں کامیاب نہیں ہوئے تھے۔

(جاری ہے)

تاہم شاہ رخ خان کا یہ خواب بالآخر پورا ہوگیا ہے۔بھارتی میڈیا کے مطابق شاہ رخ خان نے اپنے فلمی کیریئر کے 33سال بعد پہلا نیشنل فلم ایوارڈ جیت لیا ہے۔

انہیں یہ ایوارڈ 2023میں ریلیز ہونے والی فلم 'جوان' میں بہترین اداکاری پر دیا گیا ہے۔شاہ رخ خان 2023میں ہی ریلیز ہونے والی فلم '12thفیل'میں جاندار اداکاری کرنے والے وکرانت میسی کے ساتھ مشترکہ طور پر بہترین اداکار کے نیشنل ایوارڈ کے فاتح قرار پائے۔اس کے علاوہ رانی مکھرجی کو فلم 'Mrs Chatterjee vs Norway'میں شاندار اداکاری پر بہترین اداکارہ کا نیشنل ایوارڈ ملا۔شاہ رخ خان نے پہلا نیشنل ایوارڈ جیتنے پر سوشل میڈیا پر پیغام بھی جاری کیا۔شاہ رخ نے انسٹاگرام پر ایک ویڈیو پوسٹ کی ،جس میں انہوں نے نیشنل ایوارڈ جیتنے پر بھارتی حکومت اور اپنے مداحوں کا شکریہ ادا کیا۔