صنم ماروی اور احمد شاہ کے درمیان شکوے ختم، صلح ہوگئی

کراچی (اُردو پوائنٹ اخبارتازہ ترین - این این آئی۔ 19 اگست2025ء)گلوکارہ صنم ماروی اور آرٹس کونسل آف پاکستان کراچی کے صدر احمد شاہ کے درمیان گلے شکوے دور ہوگئے، دونوں نے ایک دوسرے کی غلط فہمیاں ختم کرکے صلح کرلی۔چند روز قبل صنم ماروی نے احمد شاہ کو 5 کروڑ روپے ہرجانے کا نوٹس بھجواتے ہوئے ان سے ایک ہفتے کے اندر معافی مانگنے کا مطالبہ کیا تھا، دوسری صورت میں انہیں ہرجانہ ادا کرنے اور فوجداری مقدمات کے سامنے کے لیے تیار رہنے کی دھمکی دی تھی۔

صنم ماروی کی جانب سے بھجوائے گئے نوٹس میں انہوں نے احمد شاہ پر سنگین الزامات عائد کرتے ہوئے دعوی کیا تھا کہ انہوں نے 10 اگست کو سکھر میں سندھ حکومت کے منعقد کردہ پروگرام میں گلوکارہ کی توہین کی۔گلوکارہ نے اپنے نوٹس میں دعوی کیا تھا کہ احمد شاہ نے انہیں دھکے دیے، ان کے لیے نامناسب زبان استعمال کی اور انہیں دھمکیاں تک دیں، جس سے ان کی توہین ہوئی اور انہیں ذہنی طور پر صدمہ پہنچا۔

(جاری ہے)

احمد شاہ نے صنم ماروی کے الزامات کو مسترد کرتے ہوئے کہا تھا کہ انہوں نے توہین کی، نہ دھمکیاں دیں۔اب دونوں کے درمیان وزیر ثقافت سید ذوالفقار علی شاہ اور لکھاری نور الہدی شاہ نے صلح کروالی، دونوں نے ایک دوسرے کو معاف کردیا۔سید ذوالفقار علی شاہ نے اپنے فیس بک پر ویڈیو شیئر کی، جس میں احمد شاہ نے صنم ماروی سے باالواسطہ معذرت کی اور کہا کہ ان کے درمیان جو بھی اختلافات تھے، وہ ختم ہوگئے۔

احمد شاہ نے کہا کہ صنم ماروی ان کے لیے چھوٹی بہن اور بیٹی جیسی ہے، ان کے درمیان کئی سال سے اچھے تعلقات ہیں، دونوں کے درمیان غلط فہمی کی بنیاد پر مسائل ہوئے۔انہوں نے اعتراف کیا کہ ان کے اسٹاف کے نامناسب رویے کی وجہ سے گلوکارہ کو تکلیف پہنچیں لیکن اب کے درمیان اختلافات ختم ہو چکے ہیں۔احمد شاہ کا کہنا تھا کہ ان کے اور صنم ماروی کے درمیان صلح سے ان افراد کو تکلیف ہوئی جو ثقافتی سرگرمیوں کے دشمن تھے۔