Saaye Ka Poda Jade Lagaiye - Article No. 3122

Jade نامی اس پودے کا شمار ایسے سایہ دار پودوں میں ہوتا ہے جسے لوگ گھروں کے علاوہ دفاتر میں بھی رکھتے ہیں۔اس پودے کا تعلق Crassula Ovata خاندان سے ہے۔اس پودے کی خاصیت یہ ہے کہ یہ پانی کو اپنے پتوں،تنے اور جڑوں میں ذخیرہ کر لیتا ہے۔گھروں کے اندر یہ پودے چھوٹی جھاڑی کی شکل میں 14 انچ تک بڑھتے ہیں۔اس کی شاخیں موٹی،پتے بیضوی،چمکدار اور لچک رکھتے ہیں۔آپ اس پودے کو باورچی خانے اور دفتر دونوں جگہوں پر سجاوٹ کے لئے رکھ سکتی ہیں۔
یہ درمیانی روشنی اور کمرے کے درجہ حرارت پر خوب پھلتا پھولتا ہے۔اسے مستقل یعنی روزانہ پانی نہیں دیا جاتا البتہ جب مٹی خشک ہونے لگتی ہے تو اسے پانی دیا جاتا ہے۔
Jade کے پتوں پر شیڈ یا براؤن رنگ کے نشانات نمودار ہوں تو سمجھ لیجئے کہ اب اسے پانی کی زیادہ ضرورت ہے البتہ موسم سرما میں ایسی کوئی علامت نظر نہیں آتی اور اگر ہفتے میں ایک بار بھی پانی دے دیں تو بہت ہے۔

(جاری ہے)

Jade کو پانی کے بجائے مٹی ملی کھاد کی بے حد ضرورت پڑتی ہے یعنی ہر دو ہفتوں بعد مٹی ملی کھاد ڈالئے اور نومبر سے مارچ کے آخر تک کھاد بھی نہ دیجئے یہ تر و تازہ رہتا ہے۔
موسم سرما میں یہ خوابیدگی میں رہتے ہیں۔اگر آپ کا Jade پودا کمرے میں رکھا ہے تو کوشش کریں کہ رات کو کوئی لائٹ جلتی رہے خواہ زیرو پاور کا کوئی ٹیبل لیمپ ہی جلتا رہے۔البتہ دن میں سورج کی تھوڑی سی روشنی بھی کافی ہوتی ہے۔ان پودوں کو عموماً Mealybugs سے خطرہ رہتا ہے جو اس کے تنوں اور پتوں کے نیچے جمع ہو جاتے ہیں۔ان سے نجات کے لئے کیڑے مار ادویات کا استعمال کیا جا سکتا ہے۔اگر یہ دوا آپ کو دستیاب نہ ہو تو ڈٹرجنٹ پاؤڈر ملا پانی اسپرے کر دیں۔
پاؤڈر کی طرح پھپھوندی بھی پودے پر حملہ آور ہو سکتی ہے۔آپ کپڑے پر صابن ملا پانی لگا کر اسے صاف کر لیں تو یہ پہلے کی مانند تر و تازہ ہو جاتے ہیں۔ان پودوں میں ٹھنڈے موسم میں پھول لگتے ہیں۔سفید اور گلابی پھول Jade کی خوبصورتی مزید بڑھا دیتے ہیں۔