بھاگ مِلکھا بھاگ کا ٹائٹل سونگ عارف لوہار کی آواز میں جاری

پیر 17 جون 2013 13:56

ممبئی(اُردو پوائنٹ تازہ ترین اخبار۔آئی این پی۔ 17جون 2013ء)معروف بھارتی ایتھلیٹ مِلکھا سنگھ کی زندگی کی حقیقی کہانی پر بنائی گئی فرحان اختر اور سونم کپور کی فلم \"بھاگ مِلکھا بھاگ\"کیلئے پاکستانی فوک گلوکار عارف لوہار کی آواز میں ٹائٹل سونگ کا آڈیو جاری کردیا گیا ہے۔پرسوں جوشی کے تحریر کردہ \"بھاگ ملکھا بھاگ\"کے بولوں پر مبنی اس اوریجنل ساوٴنڈٹریک کیلئے معروف پاکستانی گلوکار عارف لوہارکی سْریلی آواز کا انتخاب کیا گیا ہے جبکہ گانے سمیت فلم کی موسیقی موسیقار ٹرائیو شنکر احسان لوئے نے ترتیب دی ہے۔

ہدایتکار راکیش اوم پرکاش مہرا کی اس فلم کے لیے مِلکھا سنگھ نے اپنی زندگی کی کہانی صرف ایک روپے کے عوض فروخت کی ہے جس میں فرحان اختر مِلکھا سنگھ کے کردار کو نبھارہے ہیں اور ناصرف انہوں نے خصوصی گیٹ اپ کیا ہے بلکہ ایک ایتھلیٹ کی طرح گراوٴنڈ میں بھرپور تیاری کا مظاہرہ بھی پیش کیا ہے۔

(جاری ہے)

ہدایتکار اوم پرکاش مہرا نے اس فلم کو خود ہی پروڈیوس کیا ہے جس میں مرکزی کرداروں کے لیے فرحان اختر کیساتھ سونم کپور کا چناوٴ کیا گیا ہے جبکہ مِلکھا سنگھ کی بیان کی گئی کہانی کو پرسون جوشی نے فلمی انداز میں تحریر کیا ہے۔

شنکر احسان لوئے کی موسیقی لیے یہ فلم12جولائی کو سینما گھروں کی زینت بنائی جائیگی۔واضح رہے کہ فلم کا نام ایتھلیٹ مِلکھا سنگھ کے والد کے آخری الفاظ جو انہوں نے تقسیم ہند کے موقع پر انہیں کہے تھے کہ\"بھاگ مِلکھا بھاگ\"ہی رکھا گیا ہے جبکہ اس سے حاصل ہونے والا پورا منافع ضرورت مند ایتھلیٹس کی مدد کے لیے وقف کردیا جائیگا۔

Facebook Twitter Google + Share on Whatsapp

بھاگ مِلکھا بھاگ کا ٹائٹل سونگ عارف لوہار کی آواز میں جاری

مزید فن و فنکار کی خبریں