اعلیٰ تعلیمی اداروں کو خود کفیل بنائیں گے، رانا مشہود احمد خان

لاہور(اُردو پوائنٹ تازہ ترین اخبار۔ 18اگست 2014ء) صوبائی وزیر تعلیم پنجاب رانا مشہود احمد خان نے کہا ہے کہ اعلیٰ تعلیمی اداروں کو خود کفیل بنا رہے ہیں اور فالتو زمین کو تجارتی سرگرمیوں کے لئے استعمال کر کے اپنے پیروں پر کھڑا ہونے کے مواقع فراہم کیا جائے گا وہ پنجاب یونیورسٹی وائس چانسلر آفس کے کمیٹی روم میں پنجاب یونیورسٹی اور لاہور ڈویلپمنٹ اتھارٹی کے درمیان مولانا شوکت علی روڈ اور وحدت روڈ کو ملانے کے لئے یونیورسٹی کی اراضی پر سڑک کی تعمیر کے لئے معاہدے پر دستخطوں کی تقریب سے خطاب کر رہے تھے۔

اس موقع پر وائس چانسلر ڈاکٹر مجاہد کامران، خواجہ احمد حسان، مصطفی امام، ڈائریکٹر جنرل ایل ڈی اے احد چیمہ، رجسٹرار پنجاب یونیورسٹی پروفیسر ڈاکٹر امین اطہر، ممبران پنجاب یونیورسٹی سینڈیکیٹ اور انتظامی عہدیداران موجود تھے۔

(جاری ہے)

تقریب سے خطاب کرتے ہوئے رانا مشہود احمد خان نے کہا کہ متصل علاقے میں ٹریفک کے دباو کو کم کرنے اور عوام کو آسان سفری سہولیات فراہم کرنا وزیر اعلیٰ پنجاب میاں شہباز شریف کی دیرینہ خواہش تھی اور اس سڑک کی تعمیر سے نہ صرف وقت بلکہ تیل کی بھی بچت ہو گی ۔

انہوں نے کہا کہ منصوبے سے نہ صرف عوام بلکہ پنجاب یونیورسٹی کو بھی فائدہ ہو گا۔ انہوں نے منصوبے کی منظوری کے سلسلے میں وائس چانسلر ڈاکٹر مجاہد کامران ، ممبران سینڈیکیٹ، خواجہ احمد حسان اور احد چیمہ کی کاوشوں کو سراہا۔ اس موقع پر ڈاکٹر مجاہد کامران نے کہا کہ یہ منصوبہ یونیورسٹی کی تاریخ میں سنگِ میل ثابت ہو گا۔ انہوں نے کہا کہ پنجاب یونیورسٹی اپنے وسائل یونیورسٹی کے 67 فیصد اخراجات خود پورے کرتے ہے مگر تنخواہوں میں اضافے اور دیگر وجوہات کے باعث یونیورسٹی کے اخراجات کے باعث یونیورسٹی کے اخراجات بڑھ رہے ہیں اس کے علاوہ اساتذہ کو رہائشی سہولیات کی فراہمی اور تربیت ، لیبارٹریوں کے قیام، آلات کی خریداری، طلباء و طالبات کو مزید سہولیات کی فراہمی وغیرہ کے لئے مالی مشکلات کا بھی سامنا ہے۔

انہوں نے امید ظاہر کی کہ معاہدے کی بدولت سڑک کے اطراف پر تجارتی سرگرمیوں سے حاصل ہونے والی رقم سے پنجاب یونیورسٹی پاکستان کی وہ پہلی یونیورسٹی بن جائے گی جو مالی اعتبار سے کلی طور خود اپنے پیروں پر کھڑی ہو گی۔ خواجہ احمد حسان نے کہا کہ معاہدے کو ممکن بنانے کے لئے گفت و شنید کا راستہ اختیار کیا گیا ہے جس سے عوام اور پنجاب یونیورسٹی دونوں مستفید ہوں ۔ احد چیمہ نے کہا کہ دو کلومیٹر طویل سڑک ، متصل سائیڈ روڈز اور نہر پر انڈر پاس کے اس منصوبے پر 1.7 ارب روپے کی لاگت آئے گی اور دو ہفتوں بعد کام شروع کیا جائے گا۔ معاہدے پر وائس چانسلر ڈاکٹر مجاہد کامران اور ڈائریکٹر جنرل ایل ڈی اے احد چیمہ نے دستخط کئے۔