وزیر اعلیٰ پنجاب کی ہدایت پرصوبائی وزیر زراعت ڈاکٹرفرخ جاویدکا شدید بار ش میں اوکاڑہ کا ہنگامی دورہ ،

ڈی ایچ کیواوکاڑہ میں زخمیوں کی عیادت کی؛ متاثرین کی امداد کیلئے تمام تر وسائل بروکار لائیں گے‘ڈاکٹر فرخ جاوید

جمعرات 4 ستمبر 2014 23:10

لاہور(اُردو پوائنٹ تازہ ترین اخبار۔4ستمبر 2014ء ) وزیر اعلیٰ پنجاب کی ہدایت پرصوبائی وزیر زراعت ڈاکٹرفرخ جاویدنے شدید بار ش میں اوکاڑہ کا ہنگامی دورہ کیا۔ ڈاکٹر فرخ جاوید نے ڈی ایچ کیو ہسپتال اوکاڑہ میں دیواریں اور مکان گرنے سے زخمی ہونے والے افراد کی عیادت کی۔ صوبائی وزیر زراعت نے ضلعی انتظامیہ کو ان زخمیوں کو بہترین طبی سہولیات فراہم کرنے کی ہدایت کی ہے۔

(جاری ہے)

تفصیلات کے مطابق حالیہ دنوں میں ہونے والی شدید بارشوں کے پیش نظر وزیر اعلیٰ پنجاب اور انکی پور ی ٹیم پوری طرح متحرک ہے اور بارش سے ہونے والے نقصانات کے ازالہ کیلئے تمام مشینری کو متحرک کر دیا ہے۔ صوبائی وزیر زراعت ڈاکٹر فرخ جاوید اسی غرض سے ساہیوال ڈویژن میں ہیں جہاں انہوں نے تمام ضلعی انتظامیہ سے ملاقات کی اور سنگین حالات کے پیش نظر انہیں الرٹ رہنے کی ہدایت کی۔

اس موقع پر گفتگو کرتے ہوئے صوبائی وزیر زراعت نے کہا کہ پنجاب حکومت مصیبت اور امتحان کی گھڑی میں عوام کو اکیلا نہیں چھوڑے گی۔ صوبائی وزیر زراعت نے ضلعی انتظامیہ کو ہدایت کی ہے کہ حالیہ بارشوں سے متاثر ہ عمارتوں کا سروے کریں تاکہ متاثرین کی امداد کی جا سکے۔ انہوں نے کہا کہ حکومت پنجاب متاثرین کی مشکلات دور کرنے کیلئے تمام تر وسائل بروکار لائے گی۔