ڈسٹرکٹ ہیڈکوارٹرزہسپتال وہاڑی میں نومولود بچوں کی ہلاکت،خواجہ سلمان رفیق وہاڑی پہنچ گئے،وزیراعلیٰ پنجاب کی ہدایت سیکرٹری صحت نے ماہرین پر مشتمل کمیٹی تشکیل دے دی

منگل 9 ستمبر 2014 15:25

لاہور( اُردو پوائنٹ اخبار تازہ ترین۔9 ستمبر۔2014ء ) وزیراعلیٰ پنجاب محمد شہبازشریف کی ہدایت پر سیکرٹری صحت جواد رفیق ملک نے ڈسٹرکٹ ہیڈکوارٹرز ہسپتال وہاڑی میں مبینہ طور پر آکسیجن کی کمی کی وجہ سے 7نومولود بچوں کی ہلاکتوں کی تحقیقات کے لیے ماہرین پر مشتمل 4رکنی کمیٹی تشکیل دے دی ہے جو 24گھنٹے کے اندر اپنی رپورٹ پیش کرے گی۔

(جاری ہے)

سیکرٹری صحت کی جانب سے تشکیل دی گئی کمیٹی میں چلڈرن ہسپتال لاہور کے ایسوسی ایٹ پروفیسر ڈاکٹر ہارون حامد ، ایسوسی ایٹ پروفیسر ڈاکٹر ناصر رانا، ایسوسی ایٹ پروفیسر ڈاکٹر سکندر حیات اور محکمہ صحت کے بائیو میڈیکل انجینئر مظہر محمود شامل ہیں۔

تحقیقاتی ٹیم نے ڈسٹرکٹ ہیڈکوارٹرز ہسپتال وہاڑی پہنچ کر افسوسناک واقع کی تحقیقات شروع کردی ہیں۔دریں اثناء وزیراعلیٰ کی ہدایت پر مشیر صحت خواجہ سلمان رفیق ڈائریکٹر جنرل ہیلتھ ڈاکٹر زاہد پرویز کے ہمراہ منگل کی دوپہر وہاڑی کے لیے روانہ ہوگئے۔ خواجہ سلمان رفیق ڈسٹرکٹ ہیڈکوارٹرز ہسپتال میں نومولود بچوں کی ہلاکتوں کے بارے ذاتی طور پر تحقیقات کر کے اور لواحقین سے ملاقات کر کے وزیراعلی پنجاب کو اس واقعہ کے بارے علیحدہ سے رپورٹ پیش کریں گے۔