سعودی عرب میں دنیا کا سب سے بڑامیٹروبس منصوبہ شروع

ریاض(اُردو پوائنٹ اخبار تازہ ترین۔30اکتوبر 2014ء) سعودی عرب میں دنیا کاسب سے بڑامیٹروبس منصوبہ شروع کردیاگیا، ریاض میٹرو سروس دنیا کا اپنی نوعیت کا سب سے گراں قیمت منصوبہ ہے جس پر 22 ارب 50 کروڑ ڈالر کی خطیر رقم خرچ ہو گی۔ یہ منصوبہ اگلے چار سال میں مکمل ہو گا۔ریاض میٹرو پروجیکٹ کے ڈپٹی ڈائریکٹر عبداللہ اللحیدان نے فرانسیسی خبر رساں ایجنسی کو بتایا کہ اتنے بڑے پیمانے پر میٹرو منصوبہ اس وقت مشرق وسطیٰ میں صرف سعودی عرب نے شروع کیا ہے۔

(جاری ہے)

انہوں نے کہا کہ مجھے یقین ہے کہ ریاض میٹرو بس سروس اپنی انفرادیت قائم رکھے گا اور اب معاصر پروجیکٹس میں دنیا کا سب سے بڑا منصوبہ ہو گا۔منصوبے کے ڈپٹی ڈائریکٹر کا کہنا تھا کہ سعودی عرب میں پبلک ٹرانسپورٹ کی تاریخ کا یہ سب سے بڑا پروجیکٹ ہے۔ اس کی لمبائی 176 کلومیٹر ہے جو 2018ء کے اواخر تک اختتام پذیر ہو گا۔ اس منصوبے میں میٹرو ٹرین اور میٹرو بس سروس کا ایک ساتھ انتظام کیا گیا ہے۔اللحیدان نے بتایا کہ دارالحکومت ریاض کی آبادی میں اضافے کے پیش نظر اس نوعیت کے منصوبے پر کام کا آغاز وقت کی ضرورت ہے کیونکہ سنہ 2030ء تک ریاض کی آبادی پانچ اعشاریہ سات ملین سے بڑھ کر 8 اعشاریہ 2 ملین ہو جائے گی۔