پاکستان سپر لیگ کے میچز کراچی میں بھی کرانے کیلئے کوششیں تیز ہو گئیں ،ْ نجم سیٹھی کل وزیر اعلیٰ سندھ سے ملاقات کرینگے

منگل 17 اکتوبر 2017 13:02

کراچی (اُردو پوائنٹ اخبارتازہ ترین - این این آئی۔ 17 اکتوبر2017ء) پاکستان سپر لیگ کے میچز کراچی میں بھی کرانے کیلئے کوششیں تیز ہو گئیں اس سلسلے میں پاکستان کرکٹ بورڈ کے چیئرمین نجم سیٹھی کل بدھ کو وزیر اعلیٰ سندھ سے ملاقات کریں گے جس میں اہم امور پرگفتگو ہو گی ۔کراچی میں انٹرنیشنل کرکٹرز کو ایکشن میں دیکھنے کی شہریوں کی خواہش جلد پوری ہونے کا امکان ہے اور اس کیلئے پی سی بی نے کوششیں تیز کر دی ہیں اور اب نجم سیٹھی مراد علی شاہ سے ملاقات کرینگے چیئرمین پی سی بی نجم سیٹھی کا کہنا ہے کہ وہ پی ایس ایل کے چند میچز کراچی میں کرانے کیلئے پر عزم ہیں اور ان کی تیاریوں کے سلسلے میں ہی وزیر اعلیٰ سندھ سے ملیں گے۔

انہوں نے کہا کہ اس کیلئے وہ صرف حکومت نہیں بلکہ سب کا تعاون اور نیک خواہشات چاہتے ہیں ۔

(جاری ہے)

ذرائع کے مطابق نجم سیٹھی بدھ کی صبح 11 بجے وزیر اعلیٰ سندھ سے ملاقات کریں گے، جس میں کراچی بین الاقومی کرکٹ کی بحالی پر گفتگو ہوگی۔ذرائع کا کہنا ہے کہ وزیر اعلیٰ سندھ پاکستان کرکٹ ٹیم کو عشائیہ پر بھی مدعو کریں گے۔ذرائع کے مطابق سندھ حکومت نے نیشنل کرکٹ اسٹیڈیم میں پی ایس ایل میچز کرانے کے لئے چیئرمین پی سی بی نجم سیٹھی کو سیکورٹی سمیت ہر قسم کے تعاون کی یقین دہانی کرائی ہے۔

اس سے قبل وزیراعلیٰ سندھ سید مراد علی شاہ نے ورلڈ الیون ٹیم کی آمد کے موقع پر ایک میچ کراچی میں کرانے کی خواہش کا اظہار کیا تھا جس پر نجم سیٹھی کا کہنا تھا کہ جلد عالمی کرکٹر ملک کے دیگر شہروں میں بھی کھیلیں گے۔