قومی دولت کی لوٹ مار کرنیوالے افراد کو عدالت اپنے منطقی انجام تک پہنچائے،ڈاکٹرمعراج الہدی صدیقی

کرپشن ودہشتگردی کے شیطانی کھیل کا خاتمہ قوم کی اولین ترجیح ہے،مک مکا ،این آراو کی سیاست کا باب اب ختم ہونا چاہئے،امیر جماعت اسلامی سندھ

پیر 23 اکتوبر 2017 20:04

کراچی(اُردو پوائنٹ اخبارتازہ ترین - این این آئی۔ 23 اکتوبر2017ء) جماعت اسلامی سندھ کے امیر ڈاکٹر معراج الہدیٰ صدیقی نے کہا ہے کہ قومی دولت کی لوٹ مار کرنے والے افراد کو عدالت اپنے منطقی انجام تک پہنچائے،کرپشن ودہشتگردی کے شیطانی کھیل کا خاتمہ قوم کی اولین ترجیع ہے،جماعت اسلامی پرامن، اسلامی اور خوشحال پاکستان کیلئے اپنی جدوجہد جاری رکھے گی،مک مکا اور این آراو کی سیاست کا باب اب ختم ہونا چاہئے، ،عدالتوں نے انصاف نہ دیا تو پھر قومی لٹیروں کو گھسیٹنے کیلئے عوام کو مجبوراً سڑکوں پر آنا پڑے گا۔

ان خیالات کا اظہار انہوں نے جماعت اسلامی سندھ کے ضلعی امراء کے اجلاس سے خطاب کرتے ہوئے کیا۔اجلاس میں سہ ماہی کارکردگی رپورٹ کا جائزہ اور آئندہ کی منصوبہ بندی بھی کی گئی۔

(جاری ہے)

ڈاکٹر معراج الہدیٰ صدیقی نے مزید کہا کہ کرپشن اور کرپٹ قیادت نے خوشحال سندھ کو بدحال کردیا ہے،گذشتہ 10سالوں سے سندھ پر برسراقتدار پیپلزپارٹی کی قیادت نے عوام کو بے روزگاری،بھوک وافلاس اور کرپشن کے تحفوں کے سوا کچھ نہیں دیا،شرجیل میمن ،صوبائی وزیرقانون سمیت دیگرپارٹی رہنما و صوبائی وزراء کیخلاف کرپشن کے مقدمات چل رہے ہیں،تھر میں غذائی خوراک کی قلت اور طبی سہولیات کی کمی کی وجہ سے معصوم بچوں کی اموات کا سلسلہ جاری ہے مگرحکومت بے حسی کی عملی تصویر بنی ہوئی ہے۔

انہوں نے کہا کہ کرپٹ قیادت سے نجات دیانتدار قیادت کو آگے لانے سے ہی سندھ میں پائیدار امن اور ترقی وخوشحالی کے ساتھ عوام کے مسائل حل ہوں گے۔