Live Updates

فواد عالم کو ڈومیسٹک کرکٹ میں رنز کے باوجود ڈراپ کرنا سمجھ سے باہر :وسیم اکرم

پیر 16 اپریل 2018 12:00

لاہور (اردو پوائنٹ تازہ ترین اخبار۔16اپریل 2018ء) پاکستان کے لیجنڈ کرکٹر اور سوئنگ باﺅلنگ کے سلطان وسیم اکرم کا کہنا ہے کہ دورہ آئر لینڈ اورانگلینڈ میں پاکستان ٹیم کے لیے کنڈیشنز آسان نہیں ہوں گی، فواد عالم جیسے بلے باز کو ڈومیسٹک کرکٹ میں رنز کرنے کے باوجود ڈراپ کرنا سمجھ سے باہر ہے۔تفصیلات کے مطابق دورہ انگلینڈ اور آئرلینڈ کےلئے قومی ٹیم کے اعلان کے بعد فواد عالم کی عدم شمولیت پر شائقین کرکٹ نے انتہائی مایوسی کا اظہار کیا اور سوئنگ کے سلطان وسیم اکرم نے بھی شائقین کے ساتھ اپنی آواز ملا دی ۔

لاہور میں میڈیا سے گفتگو کرتے ہوئے سابق کپتان وسیم اکرم نے کہا کہ چیف سلیکٹر انضمام الحق اور ہیڈ کوچ مکی آرتھر اب نوجوان کرکٹرز کو موقع دے کر مستقبل کی طرف دیکھ رہے ہیں لیکن وہ یہ بھی بتائیں کہ ڈومیسٹک کرکٹ کس لیے ہوتی ہے؟ اگر اس میں رنز کرنے والے کو موقع نہیں ملے گا تو کس کو ملے گا؟، فواد عالم کو موقع نہ دینا سمجھ سے باہر ہے۔

(جاری ہے)

انہوں نے کہا کہ لیگ سپنر یاسر شاہ کے نہ ہونے سے ٹیم کو اس دورے میں نقصان ہو گا، دو سپنرز اور تین ا وپنرز ٹیم میں ہونے چاہیے تھے۔

فاسٹ باﺅلروہاب ریاض کے حوالے سے وسیم اکرم کا کہنا تھا کہ وہاب ریاض کی کارکردگی میں تسلسل نہیں اور وہ مہنگے ثابت ہوتے رہے ہیں، نوجوان کرکٹرز کو موقع دینا اچھی بات ہے، ٹیم میں فخر زمان کی شمولیت خوش آئند ہے۔