نئی ٹی 20 رینکنگ‘ فرحان کی بڑی چھلانگ، صائم اور حسن نواز کی تنزلی

بدھ 17 ستمبر 2025 22:33

لندن(اُردو پوائنٹ اخبارتازہ ترین - آن لائن۔ 17 ستمبر2025ء)آئی سی سی کی نئی ٹی ٹوئنٹی رینکنگ میں پاکستانیوں سمیت دیگر ممالک کی ٹیموں کے کھلاڑیوں کی بھی پوزیشنز تبدیل ہوئی ہیں۔آئی سی سی ٹی ٹوئنٹی فارمیٹ کی نئی رینکنگ جاری کردی گئی ہے جس کے مطابق بھارت کے ابھیشیک شرما کی پہلی پوزیشن برقرار ہے جبکہ انگلینڈ کے فل سالٹ اور جوز بٹلر کی ایک ایک درجہ ترقی ہوئی ہے اور اب دونوں کھلاڑی بالترتیب دوسرے اور تیسرے نمبر پر آگئے ہیں۔

پاکستان کے بابر اعظم 2 درجہ تنزلی کے بعد 26 ویں اور محمد رضوان 5 درجہ تنزلی کے بعد 33 ویں نمبر پر پہنچ گئے ہیں۔قومی ٹیم کے صاحبزادہ فرحان 18 درجے چھلانگ کے بعد 56 ویں پوزیشن پر آگئے ہیں۔پاکستان کے صائم ایوب 5 درجہ تنزلی کے بعد 46ویں جبکہ حسن نواز 12 درجے تنزلی کے بعد 47ویں پوزیشن پر چلے گئے ہیں۔

(جاری ہے)

دوسری جانب ٹی ٹوئنٹی بولرز میں بھارت کے ورن چکرورتی نمبر ون بولر بن گئے ہیں، انہوں نے 3 درجے ترقی کے بعد نیوزی لینڈ کے جیکب ڈفی سے پہلی پوزیشن چھینی اور اب جیکب ڈفی دوسری پوزیشن پر چلے گئے ہیں۔

پاکستان کے سفیان مقیم 4 درجے بہتری کے بعد 11 ویں اور ابرار احمد 11 درجے چھلانگ کے بعد 16 ویں پوزیشن پر آگئے ہیں۔ٹی ٹوئنٹی آل راؤنڈرز کی رینکنگ میں بھارت کے ہردک پانڈیا کی پہلی پوزیشن برقرار ہے۔