یو اے ای جیسے کمزور حریف کیخلاف پوری جان مارنے کے بعد پاکستان کی فتح

دبئی (اُردو پوائنٹ اخبارتازہ ترین۔ 17 ستمبر2025ء) یو اے ای جیسے کمزور حریف کیخلاف پوری جان مارنے کے بعد پاکستان کی فتح، پاکستان نے میزبان ملک کیخلاف فتح کے بعد ایشیا کپ سپر 4 مرحلے تک رسائی حاصل کر لی، ایشیا کپ کے ناک آوٹ میچ میں پاکستانی بلے بازوں کی ناکامی کے باعث یو اے ای کو 147 رنز کا آسان ہدف ملا، شاہین شاہ آفریدی کی آل راونڈ کارکردگی کے باعث پاکستان نے فتح حاصل کر لی، یو اے ای کی پوری ٹیم 103 رنز پر پویلین لوٹ گئی۔

دبئی کرکٹ اسٹیڈیم میں پاکستان اور یو اے ای کی ٹیمیں ناک آوٹ میچ کے سلسلے میں آمنے سامنے آئیں۔ متحدہ عرب امارات نے پاکستان کیخلاف ٹاس جیتنے کے بعد پہلے فیلڈنگ کرنے کا فیصلہ کیا۔ پاکستان کرکٹ ٹیم میں 2 تبدیلیاں کرتے ہوئے صفیان مقیم اور فہیم اشرف کی جگہ حارث روف اور خوشدل شاہ کو ٹیم کا حصہ بنایا گیا۔

(جاری ہے)

میچ سے قبل پاکستان کرکٹ بورڈ کی جانب سے جاری اعلامیہ میں کہا گیا ہے کہ آئی سی سی کے متنازعہ میچ ریفری اینڈی پائی کرافٹ نے پاکستانی کرکٹ ٹیم کے مینجر اور ٹیم کے کپتان سے معذرت کر لی۔

اینڈی پائی کرافٹ نے انڈیا پاکستان کے میچ میں دونوں ٹیموں کے کپتانوں کو مصافحہ کرنے سے منع کیا تھا۔ پاکستان کرکٹ بورڈ نے اینڈی پائی کرافٹ کے اس عمل پر سخت رد عمل کا اظہار کیا تھا،اینڈی پائی کرافٹ نے 14 ستمبر کے واقعہ کو مس کمیونیکیشن کا نتیجہ قرار دے کر معذرت کی۔آئی سی سی نے 14 ستمبر کو میچ کے دوران کوڈ آف کنڈکٹ کی خلاف ورزی کی انکوائری پر آمادگی کا اظہار کر دیا ۔

واضح رہے کہ متنازعہ ایمپائر اینڈی پائی کرافٹ نے پاکستان کرکٹ ٹیم سے معافی تو مانگ لی، تاہم پاکستان اس حوالے سے آئی سی سی سے اپنا مطالبہ منوانے میں ناکام ہو گیا۔ پاکستان کرکٹ بورڈ کی جانب سے سخت موقف اختیار کرتے ہوئے مطالبہ کیا گیا تھا کہ اینڈی پائی کرافٹ کو پاکستان کے میچز سپروائز کرنے سے روکا جائے، اگر ایسا نہیں ہوتا تو پاکستان ایشیا کپ کے بقیہ میچز کا بائیکاٹ کر دے گا۔

اس حوالے سے بدھ کے روز اس وقت ہلچل دیکھی گئی جب آئی سی سی نے پاکستان کا مطالبہ مسترد کر دیا اور اینڈی پائی کرافٹ پاکستان اور یو اے ای کا میچ سپروائرز کرنے کیلئے دبئی کرکٹ اسٹیڈیم پہنچ گئے۔ اس موقع پر چئیرمین پی سی بی محسن نقوی نے پاکستان کرکٹ ٹیم کو ہوٹل سے اسٹیڈیم کیلئے روانہ ہونے سے روک دیا۔ یہ اطلاعات بھی سامنے آئیں کہ پاکستان اور یو اے ای کا میچ منسوخ ہونے کا امکان ہے۔

پی سی بی کی جانب سے دوبارہ مطالبہ کیا گیا کہ اینڈی پائی کرافٹ کی جگہ کسی دوسرے میچ ریفری کو پاکستان اور یو اے ای کا میچ سپروائز کرنے کی ذمے داری سونپی جائے۔ تاہم پاکستان کرکٹ بورڈ ایک مرتبہ پھر آئی سی سی سے اپنا مطالبہ منوانے میں ناکام رہا، اینڈی پائی کرافٹ کی جانب سے معذرت کرنے پر پاکستان کرکٹ بورڈ نے یو اے ای کیخلاف میچ کھیلنے کیلئے رضامندی ظاہر کر دی۔