سفارتکاری انتہائی مشکل مسائل کا حل نکالتی ہے ،ْ سفیر ڈیوڈ ہیل

اسلام آباد (اُردو پوائنٹ اخبارتازہ ترین - این این آئی۔ 17 اپریل2018ء)پاکستان میں تعینات امریکہ کے سفیر ڈیوڈ ہیل نے پشاور یونیورسٹی کے شعبہ بین الاقوامی تعلقات کے طالب علموں کے ایک گروپ کی پاک امریکہ تعلقات اور فروغ امن میں سفارت کاری کے کردار کے موضوع پر ایک مباحثے کی میزبانی کی۔امریکی سفارت خانے سے جاری ایک بیان میں کہا گیا کہ طالب علموں کے ساتھ گفتگو کرتے ہوئے سفیر ہیل نے بین الاقوامی تعلقات کی تعلیم حاصل کرنے کے بارے میں ذاتی تجربے اور پیشہ ورانہ زندگی پر اس کے اثرات کے بارے میں اظہار خیال کیا۔

سفیر ڈیوڈ ہیل نے کہاکہ سفارت کار ی انتہائی مشکل مسائل کا حل نکالتی ہے اور پاکستان کی آئندہ نسل کے رہنماؤں میں جن کی آپ نمائندگی کرتے ہیں، علاقائی امن اور استحکام لانے میں مددگار ثابت ہو سکتی ہے۔

(جاری ہے)

طالب علموں کے ساتھ سفیر ہیل کی ملاقات اس پروگرام کا حصہ تھی ،ْ امریکی افسران نے بھی طالب علموں کو سفارت خانے کے کام کے بارے میں آگہی دی اور امریکہ میں پاکستانی طالب علموں کیلئے موجود حصول تعلیم اور تبادلہ پروگراموں کے بارے میں تفصیلات بتائیں۔

بیان کے مطابق اس موقع پر پشاور یونیورسٹی کی شعبہ بین الاقوامی تعلقات (انٹرنیشنل ریلیشنز ) کے چیئرمین سید حسین شہید سہروردی نے کہا کہ ’’یہ میرے طلبہ کے لیے کسی سفیر سے بات چیت اور پاکستان کے امریکہ کے ساتھ تعلقات کے بارے میں گہرا ادراک حاصل کرنے کا منفرد موقع تھا۔انہوںنے کہاکہ امریکی سفارتکاروں کے سامنے اپنا نقطہ نظر بیان کرنے کا موقع ملنا امریکہ کے ساتھ موجود ہمارے مضبوط تعلیمی تعاون کی عکاسی کرتا ہے۔