صحت کی بہترین اور جدید سہولیات کی فراہمی حکومت پنجاب کی اہم ترین ترجیح ہے، خواجہ عمران نذید

بدھ اپریل 20:29

حافظ آباد (اُردو پوائنٹ اخبارتازہ ترین۔ 18 اپریل2018ء) صوبائی وزیر برائے پرائمری اینڈ سکینڈری ہیلتھ پنجاب خواجہ عمران نذید نے کہا ہے کہ صحت کی بہترین اور جدید سہولیات کی فراہمی حکومت پنجاب کی اہم ترین ترجیح ہے اور تمام ممکنہ وسائل برائے کار لاتے ہوئے حکومت سرکاری ہسپتالوں اور مراکز صحت میں معیاری ادویات کی مفت فراہمی اور علاج معالجہ کی سہولیات کی بآسانی دستیابی کو یقینی بنا رہی ہے ۔

انہوں نے کہا کہ خادم پنجاب محمد شہباز شریف کے ویژن کے تحت اربوں کی لاگت سے صوبہ بھر کے بڑے ہسپتالوں کے ساتھ تحصیل ہیڈ کوارٹرز ہسپتال اور دیہی مراکز صحت کی سطح پر بھی جدید انفراسٹرکچر ،طبی آلات کی فراہمی اور معیاری ٹیسٹوں کی مفت سہولیات کو ممکن بنایا گیا اور اسوقت صوبہ بھر میں ہسپتالوں کی حالت ماضی کے مقابلہ میں بہت بہتر ہے ۔

(جاری ہے)

انہوں نے کہا کہ خادم پنجاب کی ہدایت پر تمام دستیاب وسائل کو پوری ایمانداری اور ذمہ داری سے استعمال کرتے ہوئے عوامی امنگوں کے مطابق ہسپتالوں کی کارکردگی میں بہتری لائی جا رہی ہے ۔

انہوں نے ان خیالات کا اظہار ڈسٹرکٹ ہیڈ کوارٹر ہسپتال حافظ آباد کے اچانک دورہ کے موقع پر کیا ۔ڈپٹی کمشنر حافظ آباد صالحہ سعید ،سی ای او ہیلتھ ڈاکٹر حامد رفیق اور محکمہ کے دیگر افسران بھی انکے ہمراہ تھے ۔صوبائی وزیر نے ایمرجنسی ،آئوٹ ڈور ،ان ڈور ،گائنی اور میڈیشن سٹور کو دورہ کیا ۔انہوں نے ایمرجنسی میں زیر علاج مریضوں سے ادویات کی دستیابی اور ڈاکٹروں کے روے اور انہیں دی جانے والی طبی سہولیات کے حوالہ سے معلوم کیا۔

مریضوں نے صوبائی وزیر کو بتایا کہ ڈاکٹروں کی جانب سے تمام سہولیات فراہم کی گئی ہیں جبکہ انہیں ہسپتال ہی سے مفت ادویات بھی دستیاب ہیں۔صوبائی وزیر نے انفراسٹرکچر کی بہتری کے سلسلہ میں گائنی ،آئوٹ ڈور اور ان ڈور وارڈز میں جاری تعمیراتی کاموں کو جلد از جلد مکمل کرنے کی ہدایت دیتے ہوئے کہا کہ وہ بلا جواز تاخیر کو کسی صورت برداشت نہیں کریں گے۔

ڈپٹی کمشنر اور سی ای او ہیلتھ نے صوبائی وزیر کو ڈسٹرکٹ ہسپتال کی کارکردگی اور مریضوں کو فراہم کی جانے والی سہولیات کے بارے میں تفصیلی بریفنگ دی۔صوبائی وزیر نے ہسپتال کی کارکردگی پر اطمینان کا اظہار کرتے ہوئے ہدایت کی کہ ہمہ وقت مذید بہتری کی گنجائش موجود ہوتی ہے اور ڈاکٹروں ،سٹاف اور معاون عملہ اپنے فرائض ایمانداری سے ادا کرتے ہوئے ہسپتال کی کارکردگی کو مذید بہتر بنائے۔