محمد حفیظ کا باولنگ ٹیسٹ ہوگیا، پاکستانی شائقین کرکٹ کیلئے بری خبر

لندن (اُردو پوائنٹ اخبارتازہ ترین۔ 19 اپریل2018ء) قومی ٹیم کے مایہ ناز آل راؤنڈر محمد حفیظ کے باؤلنگ ایکشن کا ٹیسٹ انگلینڈ میں لے لیا گیا ہے اور ان کے ٹیسٹ رپورٹ آئندہ 14 روز میں آنے کا امکان ہے۔محمد حفیظ کیریئر میں کئی مرتبہ باؤلنگ ایکشن پر پابندی کا شکار ہوئے اور گزشتہ سال سری لنکا کے خلاف 5 ون ڈے میچوں کی سیریز کے دوران محمد حفیظ کا ایکشن مشکوک رپورٹ ہوا تھا۔

انٹرنیشنل کرکٹ کونسل نے 2 نومبر کو ان کا ٹیسٹ لیا تھا اور نومبر میں ان کے باؤلنگ ایکشن کو غیرقانونی قرار دیتے ہوئے باؤلنگ پر پابندی عائد کردی تھی۔محمد حفیظ کے باؤلنگ ایکشن کا ٹیسٹ گزشتہ روز انگلینڈ کی لف بورو یونیورسٹی کی بائیو مکینک لیب میں ہوا جہاں ان سے ٹیسٹ کے دوران 3 اوورز کرائے گئے۔محمد حفیظ کے باؤلنگ ایکشن کی رپورٹ آئندہ 14 روز میں سامنے آئے جو قومی ٹیم میں ان کے مستقبل کا فیصلہ کریگی۔

(جاری ہے)

واضح رہے کہ قومی ٹیم کے ہیڈ کوچ مکی آرتھر واضح کر چکے ہیں کہ بحیثیت بلے باز حفیظ کی قومی ٹیم میں جگہ نہیں بنتی اور وہ ایک آل راؤنڈر کی حیثیت سے ہی قومی ٹیم کی نمائندگی کر سکتے ہیں لہٰذا اگر حفیظ کا ایکشن درست ثابت نہ ہوا تو ان پر قومی ٹیم کے دروازے تقریباً بند ہو جائیں گے۔50 ٹیسٹ میچز میں 52، 200 ون ڈے میچز میں 136 اور 81 ٹی20 میچز میں 49 وکٹیں حاصل کرنے والے حفیظ کو 2014 سے باؤلنگ ایکشن میں مشکلات کا سامنا رہا۔

حفیظ کا باؤلنگ ایکشن پہلی مرتبہ 2014 میں رپورٹ ہوا تھا اور اسی سال دسمبر میں انہیں باؤلنگ سے معطل کردیا گیا تھا تاہم آزادانہ جائزے کے بعد اپریل 2015 میں ان کے ایکشن کو درست قرار دے کر باؤلنگ کی اجازت دے دی گئی تھی تاہم ان کی یہ خوشی زیادہ عرصہ برقرار نہ رہی اور جون 2015 میں سری لنکا کے خلاف گال ٹیسٹ میں ان کا ایکشن دوبارہ رپورٹ ہوا جس کے بعد جولائی 2015 میں ایکشن دوسری بار غیر قانونی قرار دئیے جانے کے بعد انٹرنیشنل کرکٹ میں باؤلنگ پر ایک سال کی پابندی لگادی گئی تھی۔

گزشتہ سال نومبر میں حفیظ کا برسبین کے نیشنل کرکٹ سینٹر میں ٹیسٹ لیا گیا جہاں ان کا ایکشن درست قرار پایا تھا اور انہیں باؤلنگ کی اجازت دے دی گئی تھی تاہم ایک سال کے اندر ہی ان کا ایکشن دوبارہ رپورٹ ہو گیا تھا۔