اسلام آباد ماڈل کالج برائے خواتین (پوسٹ گریجویٹ) ایف سیون فور میں انفارمیشن کمیشن ٹیکنالوجی کے عالمی دن کے حوالہ سے تقریب

بدھ 25 اپریل 2018 17:41

اسلام آباد ۔ (اُردو پوائنٹ اخبارتازہ ترین - اے پی پی۔ 25 اپریل2018ء) اسلام آباد ماڈل کالج برائے خواتین (پوسٹ گریجویٹ) ایف سیون فور میں انفارمیشن کمیشن ٹیکنالوجی (آئی سی ٹی) کے عالمی دن کے حوالہ سے تقریب کا اہتمام کیا گیا۔ آئی سی ٹی دن منانے کا مقصد عالمی سطح پر بچوں اور نوجوان خواتین کو بااختیار بنانے اور حوصلہ افزائی کرنا ہے تاکہ وہ تیزی سے ابھرنے والے شعبہ آئی سی ٹی میں تعلیم حاصل کرکے اس شعبہ میں اپنا مستقبل بنا سکیں۔

یہ دن 2011ء سے ہر سال اپریل کے مہینے میں منایا جاتا ہے۔

(جاری ہے)

2 لاکھ 40 ہزار بچیاں اور خواتین اس میں حصہ لیتی ہیں، دنیا بھر میں 160 ممالک یہ دن مناتے ہیں۔ بدھ کو پروگرام کا آغاز تلاوت کلام پاک اور نعت رسولؐ مقبول سے ہوا۔ تحمین اعجاز نے آئی سی ٹی کی تعلیم میں لڑکیوں کے کردار پر روشنی ڈالی۔ کمپیوٹر سائنس کی لیکچرار ثناء منظور نے وزارت آئی ٹی کے زیر اہتمام چلنے والے منصوبہ پر بریفنگ دی اور رفعت خالد نے اسلام کے حوالہ سے آئی سی ٹی تعلیم میں خواتین کا کردار بیان کیا۔ کالج کی پرنسپل فرخندہ اشتیاق نے کالج میں آئی سی ٹی تعلیم میں کردار پر اظہار خیال کرتے ہوئے طالبات پر زور دیا کہ وہ آئی سی ٹی سے متعلق شعبوں میں حصہ لیں، آئندہ دور انفارمیشن ٹیکنالوجی کا ہے۔