حکومت آئی ایم ایف سے کسی بیل آئوٹ پیکج کے لئے رجوع کرنے کا ارادہ نہیں رکھتی، مفتاح اسماعیل

ہفتہ 28 اپریل 2018 18:37

اسلام آباد ۔ (اُردو پوائنٹ اخبارتازہ ترین - اے پی پی۔ 28 اپریل2018ء) وفاقی وزیر خزانہ مفتاح اسماعیل نے کہا ہے کہ حکومت بین الاقوامی مالیاتی فنڈ (آئی ایم ایف) سے کسی بیل آئوٹ پیکج کے لئے رجوع کرنے کا ارادہ نہیں رکھتی کیونکہ گزشتہ پانچ سال کے دوران اٹھائے گئے اقتصادی اقدامات سے قومی مالیاتی صورتحال مضبوط ہوئی ہے۔

(جاری ہے)

ہفتہ کو وزیراعظم کے معاون خصوصی برائے محصولات ہارون اختر خان کے ہمراہ بعد از بجٹ پریس کانفرنس کے دوران ایک سوال کے جواب میں وزیر خزانہ نے کہا کہ بیل آئوٹ پیکج کے لئے آئی ایم ایف سے رجوع کرنے کا کوئی ارادہ نہیں ہے، ہماری کوشش ہے کہ آئی ایم ایف کے پیکج سے گریز کیا جائے۔

انہوں نے امید ظاہر کی کہ حکومت کی متعارف کردہ دانشمندانہ پالیسیوں کی بدولت غیر ملکی زرمبادلہ کے ذخائر آنے والے دنوں میں مزید بہتر ہوں گے۔ وزیراعظم کے معاون خصوصی ہارون اختر خان نے اس موقع پر کہا کہ کرنٹ اکائونٹ خسارہ کی بہتری کے لئے اقدامات کا ذکر کرتے ہوئے کہا کہ حکومت نے اپنے پہلے کے بجٹ میں برآمدی پیکج کا اعلان کیا تھا جس نے ملکی برآمدات کے فروغ میں بڑی مدد کی، اگر برآمدات اسی رفتار سے بڑھتی رہی تو ہمیں کسی مالیاتی معاونت کی ضرورت نہیں ہو گی لہذا پریشانی کی کوئی بات نہیں۔