قومی ٹیم سائوتھ ایشین جونئیر اتھلیٹکس چیمپئن شپ میں شرکت کیلئے کل سری لنکا روانہ ہوگی

جمعرات 3 مئی 2018 12:44

اسلام آباد ۔ (اُردو پوائنٹ اخبارتازہ ترین۔ 03 مئی2018ء) 12 رکنی قومی ٹیم سائوتھ ایشین جونئیر اتھلیٹکس چیمپئن شپ میں شرکت کیلئے کل جمعہ کو سری لنکا روانہ ہوگی۔ یہ چیمپئن شپ 5 مئی سے سری لنکا میں شروع ہوگی۔ پاکستان اتھلیٹکس فیڈریشن کے صدر میجر جنرل(ر) محمد اکرم ساہی نے کہا ہے کہ سائوتھ ایشین جونئیر اتھلیٹکس کی تیاری کے سلسلہ میں قومی اتھلیٹکس ٹیم کے کھلاڑیوں کا تربیتی کیمپ زیرنگرانی ہیڈ کوچ محمد اصغر گل جناح سٹیڈیم میں جاری ہے 12 رکنی قومی ٹیم آٹھ مردوں اور چار خواتین کھلاڑی پر مشتمل ہے، مرد کھلاڑیوں میں محمد وسیم، محمد حمزہ، حسن رضا، محمد شہزاد، وقار یونس،، معید بلوچ ، عبدالرزاق اور غلام محی الدین جبکہ خواتین کھلاڑیوں میں تحریم، عیشا، ثائقہ اور نورالعین شامل ہیں۔

ٹیم کے ہمراہ چوہدری اقبال اختر ٹیم لیڈر جبکہ قاضی تنویر اور سمی رضوی کو کوچز ہونگے۔

(جاری ہے)

انہوں نے کہا کہ تربیتی کیمپ میں کھلاڑیوں کو محمد اصغر گل کے علاوہ دیگر کوچز قاضی تنویر، بشری پروین اور سمی رضوی جدید اور اعلی تربیت دے رہے ہیں۔ اکرم ساہی نے بتایا کہ چیمپئن شپ میں قومی ٹیم کے کھلاڑی مردوں کے 6 اور خواتین کے 3 ایونٹس میں حصہ لیں گے۔

چیمپئن شپ میں پاکستانی مرد کھلاڑی ڈیسک تھرو، 100میٹر ریس،200میٹر ریس،400میٹر ریس، 4X100 ریلے ریس اور 4X400 ریلے ریس جبکہ خواتین کھلاڑی 100میٹر ریس، 200میٹر ریس اور 4X400 ریلے ریس کے مقابلوں میں حصہ لیں گیں۔ انہوں نے کہا کہ دو روزہ سائوتھ ایشین جونیئر اتھلیٹکس چیمپئن شپ 5 مئی سے سری لنکا کے دارالحکومت کولمبو میں شروع ہوگی جس میں آٹھ ممالک کی ٹیمیں حصہ لے رہی ہیں جن میں پاکستان سمیت میزبان سری لنکا،، بھارت،، مالدیپ، نیپال، بھوٹان، افغانستان اوربنگلہ دیش شامل ہیں۔