اگر ہم متحد نہ ہوئے تو پھر باہر سے کسی دشمن کی ضرورت نہیں ،اتحاد یقین محکم وقت کی اہم ضرورت ہے‘رانا محمد ارشد

لاہور(اُردو پوائنٹ اخبارتازہ ترین - این این آئی۔ 06 مئی2018ء) معاون خصوصی وزیر اعلیٰ پنجاب رانا محمد ارشد نے اپنی رہائش گاہ پر پاکستان مسلم لیگ(ن) کے کارکنوں سے خطا ب کرتے ہوئے کہاہے کہ اگر ہم متحد نہ ہوئے تو پھر باہر سے کسی دشمن کی ضرورت نہیں ،اتحاد یقین محکم وقت کی اہم ضرورت ہے۔ موجود سسٹم کی مضبوطی اور پالیسیوں کا تسلسل ضروری ہے کہ ہم آپس میں متحد ہو کر پاکستان مخالف قوتوں کا ڈٹ کر مقابلہ کریں اور ان کے نا پاک ارادوں و نیست و نابود کر دیں ۔

انہوں نے کہاکہ پارلیمنٹ ،سینٹ ،عدلیہ ،افواج پاکستان اور تمام ریاستی اداروں کو ملکی ترقی و خوشحالی کے ایک ایجنڈے پر اکھٹے ہونا ہوگا اور ہم سب کو باہم متحد ہوکر اندر اور باہر کے دشمن کا مقابلہ کرنا ہوگا ۔ پاکستان کے مستقبل کا فیصلہ ملک کے 22کروڑ عوام نے کرنا ہے اب سیاست کا نظریہ بدل چکا ہے لوگ نام نہیں کام یاد رکھیں گے اور الحمداللہ مسلم لیگ(ن) نے پانچ برسوں میں ملک و قوم کی حقیقی خدمت کی ہے ۔

(جاری ہے)

حکومت نے اپنے وسائل پر انحصار کرتے ہوئے اور چین کی دوستی سے بجلی کے کارخانے لگائے اور ملک کو دہشت گردی کے آسیب سے پاک کیا جس کیلئے جانوں کے نذرانے دینے والے خراج عقیدت کے مستحق ہیں اور ہم شہدا کی بیوائوں او رمائوں کو سلام پیس کرتے ہیں ۔ انہوں نے کہاکہ وہ دن دور نہیںجب ساری دنیا میں پاکستان کی عزت ہوگی اور ہم اپنے وسائل پرانحصارکر تے ہوئے آگے بڑھیں گے۔

بہتر تعلیمی سہولتیں صر ف امیر لوگوں کا حق نہیں وزیر اعلیٰ پنجاب کے ویثرن نے تعلیم کے حصول لے سلسلے میں غریب کے بچے کو بھی اعلیٰ معیاری تعلیم کا خواب شرمندہ تعبیر کردیاہے اسی طرح اینڈوومنٹ فنڈ سے لاکھوں طلباء و طالبات مستفید ہورہے ہیں ۔انہوںنے کہاکہ میرٹ پرلیپ ٹاپ کی فراہمی سے سٹوڈنٹس کے مزید تعلیمی تقاضے پورے ہورہے ہیں اور اب پنجاب کے بچوں کو کیمرج اور آکسفورڈ جیسی تعلیم مل رہی ہے ۔