ایڈیشنل چیف سیکرٹری آ زادکشمیر ڈاکٹر آصف شاہ کو چیف سیکرٹری کا اضافی چارج دیدیا گیا

جمعرات 10 مئی 2018 22:45

اسلام آباد (اُردو پوائنٹ اخبارتازہ ترین - آن لائن۔ 10 مئی2018ء) آزاد کشمیر کے ایڈیشنل چیف سیکرٹری ترقیات ڈاکٹر آصف شاہ کو چیف سیکرٹری آزاد کشمیر کا اضافی چارج دیدیا گیا ہے۔آزادکشمیر سروسز اینڈ جنرل ایڈمنسٹریشن ڈیپارٹمنٹ کی جانب سے انکی تعیناتی کا باضابطہ نوٹیفیکیشن جاری کردیا گیا ہے ۔ اس سے قبل چیف سیکرٹری اعجاز منیر کو سیکرٹری ایویشن ڈویژن تعینات کردیا گیا گیا ہے۔

(جاری ہے)

ذرائع کے مطابق وفاق سے کسی بھی بیوروکریٹ نے آزاد کشمیر میں بطور چیف سیکرٹری آزادکشمیر آنے کی حامی نہیں بھری جس کے بعد وفاق میں نئی حکومت کے آنے تک ڈاکٹر آصف شاہ کو اضافی چارج دیدیا ہے ۔ ذرائع کے مطابق اسٹیبلشمنٹ ڈویژن کی جانب سے آزاد کشمیر میں چیف سیکرٹری کیلئے کئی وفاقی سیکرٹریز کو پیش کش کی گئی تھی تاہم کسی سیکرٹری نے اس وقت آزاد کشمیر کے چیف سیکرٹری کا چارج لینے سے انکار کر دیا۔اس کی ایک وجہ یہ بتائی اس وقت جو چیف سیکرٹری تعینات کیا جائے گا اس کی مدت نگران حکومت کے برابر ہو گی اور نئی حکومت نے آتے ہی اس کا تبادلہ کر دے گی۔اس سوچ کی بنیاد پر کسی بھی بیوروکریٹ نے آزاد کشمیر میں آنے کی حامی نہ بھری۔ ۔