بغیر روٹ پرمٹ چنگ چی رکشوں کے خلاف (آج) سے گرینڈ آپریشن ہوگا

11منظور شدہ روٹس کے علاوہ کسی بھی خودساختہ روٹ پر چنگ چی رکشوں کے چلنے پر پابندی ہے

اتوار مئی 16:30

راولپنڈی ۔ (اُردو پوائنٹ اخبارتازہ ترین۔ 13 مئی2018ء) ریجنل ٹرانسپورٹ اتھارٹی راولپنڈی بغیر روٹ پرمٹ چنگ چی رکشوں کے خلاف (آج ) پیر سے گرینڈ آپریشن شروع کر ے گی ، چنگ چی رکشاء مالکان کو روٹ پرمٹ کا حصول یقینی بنانے کی ہدایات جاری کر دیں گئیں۔سیکرٹری ریجنل ٹرانسپورٹ اتھارٹی خالد یامین ستی نے اے پی پی سے بات چیت کرتے ہوئے بتایاکہ ریجنل ٹرانسپورٹ اتھارٹی راولپنڈی نے شہر بھر میں مختلف روٹس پر چلنے والے چنگ چی رکشا ء مالکان کو روٹ پر مٹ کے حصول کی ہدایت کررکھی ہے اور اب تک مجموعی طور پر 50کے قریب رکشاء مالکان نے کاغذات مکمل کر کے روٹ پرمٹ حاصل کیے ہیں ۔

انہوںنے کہاکہ ریجنل ٹرانسپورٹ اتھارٹی نے بغیر روٹ پرمٹ چلنے والے چنگ چی رکشوں کے خلاف آپریشن جاری رکھنے کا فیصلہ کیا ہے اور خصوصی ٹیمیں تشکیل دے دی گئی ہیں جو کہ پیر سے ایک بار پھر بغیر روٹ پرمٹ چنگ چی رکشوں کی پکڑ دھکڑ شروع کریں گی ۔

(جاری ہے)

خالد یامین ستی نے قومی خبر ایجنسی کو بتایاکہ گذشتہ ماہ بغیر روٹ پرمٹ چنگ چی رکشوں کے خلاف آپریشن کے دوران مجموعی طور پر تقریباً 80رکشے بند کیے گئے ۔

ایک سوال کے جواب میں خالد یامین ستی نے اے پی پی کو بتایاکہ چنگ چی رکشوں کے گیارہ منظور شدہ روٹس کے علاوہ کسی بھی خودساختہ روٹ پر چنگ چی رکشوں کے چلنے پر پابندی ہے ۔انہوں نے بتایاکہ ان روٹس میں اصغر مال تا پیرودھائی ،اولڈ آفس آر ایم سی تا کیرج فیکٹری ،شمس آباد تا ہارون چوک ،کوہاٹی بازار تا بانساں والا چوک ،ڈنگی کھوئی تا خیابان سرسید ،بنی چوک تا ہولی فیملی ہسپتال ،جہاز گرائونڈ تا دفتر یو سی گنگال ،جامع مسجد گلزار قائد تا کمرشل مارکیٹ ،ڈھوک منشی تا ڈھوک کالا خان اور رائل پیلس میریج ہال تا نیو مورگاہ کے روٹس شامل ہیں ۔

خالد یامین ستی نے چنگ چی رکشاء میں سواریوں کی تعداد کے حوالے سے بتایاکہ کسی بھی چنگ چی رکشاء میں ڈرائیور سمیت پانچ سے زائد مسافروں کی اجازت نہیں ہے ۔خلاف ورزی کی صورت میں ایسے رکشوں کے خلاف قانونی کارروائی کی جائے گی ۔

متعلقہ عنوان :