امریکی ڈرون طیاروں کے ذریعے ایران کے خفیہ بیلسٹک میزائلوں کا انکشاف

واشنگٹن(اُردو پوائنٹ اخبارتازہ ترین - این این آئی۔ 05 جون2018ء) امریکی ڈرون طیاروں نے ایران میں بیلسٹک میزائل تیار کرنے کی خفیہ تنصیبات کا انکشاف کیا ہے۔ یہ بات امریکی چینل کی رپورٹ میں بتائی گئی۔ اس طرح ایران جوہری معاہدے کی ایک اہم شق کی خلاف ورزی کا مرتکب ہوا ہے۔ امریکی فوج میں سیکرٹ آپریشنز کے ایک سابق رکن برٹ ولیکوئچ کا کہنا تھا کہ میں ایران میں ان خفیہ بیلسٹک میزائلوں کے ملنے اور ان کی جگہ کے تعین پر کسی طور بھی حیران نہیں۔

انہوں نے مزید کہا کہ بعض لوگ یہ سمجھتے ہیں کہ امریکی صدر ڈونلڈ ٹرمپ نے جوہری معاہدے سے اس لیے علیحدگی اختیار کی کیوں کہ اس کا متن شیطانی تھا۔ تاہم حقیقت یہ ہے کہ امریکی صدر کو بعض لوگوں نے یہ خفیہ معلومات پہنچائی کہ ایران میں اس نوعیت کی تنصیبات موجود ہیں۔

(جاری ہے)

یہ اس بات کا اشارہ ہے کہ ایرانیوں کی جانب سے روزانہ جوہری معاہدے کی خلاف ورزی ہو رہی ہے۔

سابق امریکی عسکری اہل کار نے بتایا کہ ہم طویل عرصے سے جانتے تھے کہ ایران خفیہ بیسلٹک میزائل کی تیاری کے لیے شمالی کوریا کے شانہ بشانہ کام کر رہا ہے۔ لہذا شمالی کوریا کے ساتھ کسی بھی معاہدے پر دستخط کرنے سے قبل ہمیں ممکنہ خفیہ سرگرمیوں کو زیر غور رکھنا ہو گا۔ نشر ہونے والی تصاویر ایران کے شہر شاہرود میں خفیہ تنصیب کی ہے۔ولیکوئچ نے امریکی حکام کو نصیحت کی کہ شمالی کوریا کے ساتھ مذاکرات کے دوران اس بات کو بھی مدّ نظر رکھیں کہ ایران گزشتہ برسوں کے دوران کیا کچھ کرتا رہا ہے۔