عراق،سلطنت روما کے قدیم سکے فروخت کرنیوالے ملزمان گرفتار

790سکے برآمد، ملزمان کو آثار قدیمہ کی غیر قانونی فروخت کے الزام میں گرفتار کیا گیا،عراقی کرائم برانچ

جمعہ 29 جون 2018 16:53

بغداد(اُردو پوائنٹ اخبارتازہ ترین - آئی این پی۔ 29 جون2018ء) عراقی کرائم برانچ نیسلطنت روما کے قدیم سکے فروخت کرنے والے ملزمان کو گرفتار کر لیا، 790قدیم سکے برآمد کر لئے گئے،ملزمان کو آثار قدیمہ کی غیر قانونی فروخت کے الزام میں گرفتار کیا گیا۔ غیر ملکی ذرائع ابلاغ کے مطابق عراقی کرائم برانچ نے سلطنت روما کے قدیم سکو ں کی فروخت ناکام بناتے ہوئے ملزمان کو گرفتار کر لیا ۔

عرب ملک کے اخبار کے مطابق کرائم برانچ کو اطلاع ملی تھی کہ عراقی درالحکومت بغداد میں ہندوستانی محلے میں نامعلوم افراد سلطنت روما میں استعمال ہونے والے قدیم اور نادر سکوں کو غیر قانونی طور پر فروخت کیاجانے والا ہے ۔ اطلاع ملنے پر کرائم برانچ نے علاقے کی ریکی کرتے ہوئے اپنے کارندوں کومختلف بھیس میں وہاں تعینات کر دیا ۔

(جاری ہے)

خفیہ پولیس کے اہلکاروہاں نامعلوم ملزمان کی تلاش میں ڈیوٹی دیتے رہے اسی دوران انہو ںنے چند مشکوک افراد کو دیکھا جو اس علاقے میں اجنبی تھے ۔

ملزمان کی مشکوک حرکات پر اہلکاروں نے ان سے تفتیش کی تو ان کے قبضے سے قدیم سکے برآمد ہوئے جن کی تعداد 790 تھی ۔ قدیم سکے سلطنت روما کے دور میں مستعمل تھے جنہیں آثار قدیمہ کے طور پر محفوظ کیاجاتا ہے ۔ ملزمان کو آثار قدیمہ کی غیر قانونی فروخت کے الزام میں گرفتار کر لیا گیا ۔