الیکشن کمیشن نے تمام رجسٹرڈ ووٹرز کو ان کے ووٹ کے بارے میں معلومات کی فراہمی کیلئے خصوصی آگاہی مہم کا آغاز کر دیا

جمعرات 19 جولائی 2018 18:00

فیصل آباد۔19جولائی(اُردو پوائنٹ اخبارتازہ ترین - اے پی پی۔ 19 جولائی2018ء) 25 جولائی بروز بدھ کو ملک بھر میں منعقد ہونے والے قومی و صوبائی اسمبلیوں کے عام انتخابات کے حوالے سے الیکشن کمیشن نے تمام رجسٹرڈ ووٹرز کو ان کے ووٹ کے بارے میں معلومات کی فراہمی کیلئے خصوصی آگاہی مہم کا آغاز کر دیا ہے اور کہا ہے کہ کوئی بھی ووٹر اپنا شناختی کارڈ نمبر بذریعہ ایس ایم ایس 8300پر بھیج کر تمام معلومات حاصل کر سکتا ہے ۔

الیکشن کمیشن آف پاکستان فیصل آباد ریجن کے ترجمان نے بتایاکہ الیکشن کمیشن نے ووٹر ز کی سہولت کی غرض سے انتہائی اہم اقدام اٹھایا ہے جس کے تحت کوئی بھی ووٹر موبائل فون میسج سروس کے ذریعے اپنا قومی شناختی کارڈ نمبر الیکشن کمیشن کے متعلقہ نمبر 8300پر سینڈ کر سکتا ہے ۔

(جاری ہے)

انہوںنے اے پی پی کو بتایا کہ میسیج موصول ہوتے ہی الیکشن کمیشن پاکستان کی جانب سے متعلقہ ووٹر کو فوری طور پر جوابی ایس ایم ایس موصول ہو گا جس میں اس کے قومی شناختی کارڈ نمبر کے حوالے سے درج ووٹ کے سلسلہ نمبر ، شماریاتی بلاک کوڈ ،انتخابی علاقہ ، پولنگ سٹیشن وغیرہ کے بارے میں مفصل معلومات فراہم کر دی جائیں گی اور وہ پولنگ کے موقع پر اپنے متعلقہ پولنگ سٹیشن پر جاکر یہ میسیج دکھاتے ہوئے آسانی سے اپنا ووٹ کاسٹ کر سکے گا۔

انہوںنے بتایا کہ اس آگاہی مہم کا باقاعدہ آغاز کر دیا گیا ہے اور یہ سروس 25جولائی کو انتخابی عمل کے اختتام تک جاری رہے گی۔انہوںنے بتایا کہ الیکشن کمیشن نے تمام رجسٹرڈ ووٹرز کو یہ معلوماتی ایس ایم ایس ارسال کرنے کا سلسلہ شروع کر رکھا ہے او ربار بار ووٹرز کو اس سلسلہ میں شعور و آگاہی فراہم کی جا رہی ہے تاکہ زیادہ سے زیادہ لوگ الیکشن کے روز پولنگ سٹیشنوں پر پہنچ کر اپنا حق رائے دہی استعمال کر سکیں۔