میاں محمودالرشید کے بیٹے میاں حسن کی عبوری ضمانت میں 29 نومبر تک کی توسیع

بدھ نومبر 17:00

لاہور(اُردو پوائنٹ اخبارتازہ ترین۔ 14 نومبر2018ء) مقامی عدالت نے صوبائی وزیر ہاوسنگ میاں محمودالرشید کے بیٹے میاں حسن کی عبوری ضمانت میں 29 نومبر تک توسیع کر دی۔ایڈیشنل سیشن جج تنویر احمد اعوان نے صوبائی وزیر میاں محمودالرشید کے بیٹے میاں حسن و دیگر کی عبوری ضمانت کی درخواست پر سماعت کی۔ عبوری ضمانت کی معیاد مکمل ہونے پر میاں حسن اپنے وکیل کے ساتھ عدالت میں پیش ہوئے۔

تفتیشی افسر کی جانب سے میاں محمود الرشید کے بیٹے کے حوالے سے شامل تفتیش ہونے کے متعلق رپورٹ پیش کی گئی۔

(جاری ہے)

تھانہ غالب مارکیٹ پولیس نے عدالت کو آگاہ کیا کہ مقدمہ کی تفتیش ابھی مکمل نہیں ہوئی جس پر عدالت نے اظہار برہمی کیا اور پولیس کو پابند کیا کہ آئندہ سماعت تک ہر صورت میں تفتیش مکمل کی جائے۔صوبائی وزیر کے بیٹے کے وکیل نے عدالت سے استدعا کی کہ میاں حسن کیخلاف بے بنیاد اور من گھڑت مقدمہ درج کیا گیا ہے اس لیے ضمانت منظور کی جائے۔

تفتیشی افسر کے مطابق میاں محمود الرشید کے بیٹے میاں حسن محمود، بھتیجے حافظ علی مصطفی، محمد ولید اور شان کیخلاف تھانہ غالب مارکیٹ میں مقدمہ درج ہوا، ملزمان نے پولیس اہلکاروں پر تشدد کیا۔ کارسرکار میں مداخلت کی اور پولیس سے وائر لیس سیٹ و پسٹل چھین لیا۔

متعلقہ عنوان :