سعودی عرب کا امریکہ ،آسٹریلیا، جاپان، جنوبی کوریا، برونائی، ملائیشیا، سنگا پور، اور تائیوان کو ای ویزا سہولت فراہم کرنے کا فیصلہ

ریاض (اُردو پوائنٹ اخبارتازہ ترین - این این آئی۔ 17 دسمبر2018ء) سعودی عرب میں داخلے کیلئے ای ویزا کے نئے نظام نے دنیا بھر میں کار ریس کے شائقین کیلئے ریاض کے صوبے میں الدرعیہ کے مقام پر تین روز تک منعقد ہونیوالی’فارمولا ای‘ ریس سے لطف اندوز ہونے کا موقع فراہم کردیا۔مملکت میں سپورٹس کی جنرل اتھارٹی کے نائب سربراہ شہزادہ عبدالعزیز بن ترئی الفیصل نے باور کرایا ہے کہ ای ویزا کیلئے بہت بڑی تعداد میں درخواستیں موصول ہوئی ہیں۔

انہوں نے کہا کہ الدرعیہ میں فارمولا ای ریس کے ایونٹ میں کامیابی کے بعد اب ای ویزا کے موضوع کو زیر غور لایا جائے گا۔الدرعیہ میں فارمولا ای ریس اور اس کیساتھ ضمنی سرگرمیوں کے سلسلے میں 80 ممالک کے 1000 کے قریب غیر ملکیوں نے ای ویزا حاصل کیا ہے۔

(جاری ہے)

ذرائع کے مطابق سعودی عرب میں داخلے کیلئے جلد ہی ای ویزا کی سہولت دستیاب ہو گی، اس سے قبل سعودی عرب کا شمار اٴْن ممالک میں ہوتا تھا جہاں کا دورہ کرنے کے لیے ویزے کا حصول مشکل ترین امر ہے۔

اس لحاظ سے یہ ایک بڑی اور انقلابی پیش رفت ہو گی۔اگرچہ الیکٹرونک ویزا حاصل کرنے کے اہل ممالک کی حتمی فہرست ابھی جاری نہیں کی گئی ہے تاہم سعودی عرب کے ایک اعلان کے مطابق ای ویزا کی سہولت امریکہ آسٹریلیا، جاپان، جنوبی کوریا، جنوبی افریقا، برونائی، ملائیشیا، سنگاپور اور تائیوان کے شہریوں کو حاصل ہو گی۔ توقع ہے کہ اس فہرست میں مزید ممالک کا اضافہ کیا جائے گا۔

ویزے کے حصول کیلئے سعودی عرب میں eVisa کی ایپلی کیشن کے ذریعے انٹرنیٹ کو استعمال کرتے ہوئے چند منٹ درکار ہوں گے۔ ویزے کیلئے درخواست دہندگان کو چند بنیادی تقاضوں کو پورا کرنا ہو گا۔ لہٰذا ویزے کیلئے سفارتخانے یا قونصل خانے جانے کی ضرورت نہیں ہو گی۔ درخواست کی منظوری کے بعد ویزے کو ای میل کے ذریعے سفر کا ارادہ رکھنے والوں کو ارسال کر دیا جائیگا۔ بعد ازاں مسافر کو اس ای ویزا کا صرف ایک پرنٹ آؤٹ نکال کر اپنے پاس رکھنا ہو گا تا کہ سعودی عرب پہنچنے پر متعلقہ حکام کو پیش کیا جا سکے۔