ایس ایچ او پھلروان کی درخواست ضمانت پر عدالت عالیہ نے پولیس کو ریکارڈ سمیت طلب کر لیا

سرگودھا(اُردو پوائنٹ اخبارتازہ ترین - این این آئی۔ 24 جنوری2019ء) منشیات فروشی اور مال مقدمہ میں خرد برد کے مقدمات میں ملوث ایس ایچ او پھلروان کی درخواست ضمانت پر عدالت عالیہ نے پولیس کو ریکارڈ سمیت طلب کر لیا۔زرائع کے مطابق تھانہ شاہپور نے چک نمبر50کے پولیس یونیفارم میں ملبوس تنویر علی کو گاڑی میں دس کلو گرام افیون بھکر سمگل کرتے ہوئے گرفتار کر کے اس بیان پر گاڑی اور منشیات دینے کے الزام میں ملزم اور ایس ایچ او تھانہ پھلران ظفراقبال کے خلاف ایس ایچ او تھانہ شاہپور عظمت جوئیہ نے زیر دفعات 9C، 15Cنارکاٹکس ، 170، 171ت پ کے تحت مقدمہ درج کیا جبکہ ڈی ایس پی بھلوال ملک غلام عباس نے ملزم کے بیان کی روشنی میں تھانہ پھلروان میں چھاپہ مارا تو معلوم ہوا کہ مذکورہ گاڑی منشیات کے مقدمہ میں تھانہ میں بند تھی اور اسے ایس ایچ او نے غیر قانونی طورپر اپنے استعمال میں رکھا ہوا تھا۔

(جاری ہے)

جس پر ایس ایچ او ظفراقبال کے خلاف 409ت پ ، 155C پولیس آرڈر 2002ء کے تحت ایک اور مقدمہ درج کرولیا گیا۔ بعد ازاں تھانہ پھلروان میں درج ہونے والے مقدمہ کی تفتیش کے بعد مقدمہ اینٹی کرپشن کے سپر دکردیا گیا۔ پولیس حکام نے ایس ایچ او ظفراقبال کو معطل کرکے انکوائری کیلئے ڈی ایس پی سٹی سرگودھا سلطان محمود کی سربراہی میں کمیٹی قائم کردی۔ سابق ایس ایچ او تھانہ پھلروان ظفراقبال نے ہائی کور ٹ لاہور سے ضمانت کیلئے درخواست دائر کی تو عدالت عالیہ نے 24جنوری کو پولیس کو ریکارڈ سمیت طلب کر لیا جبکہ سپیشل جج اینٹی کرپشن نے 29جنوری کو مقدمہ کا ریکارڈ پیش کرنے کا حکم دیا ہے۔