شادیوں کی اجتماعی تقریب 24 مارچ اتوار کو ماڈل ٹائون میں ہو گی

22 مسلم ،ایک مسیحی جوڑا نئی زندگی کا آغاز کریں گے،تیاریاں مکمل ،منہاج القرآن علماء کونسل کے سکالرز نکاح پڑھائیں گے

جمعرات 21 مارچ 2019 16:19

لاہور(اُردو پوائنٹ اخبارتازہ ترین - این این آئی۔ 21 مارچ2019ء) تحریک منہاج القرآن کے زیر اہتمام 23شادیوں کی اجتماعی تقریب 24 مارچ 2019 ء اتوار کو صبح 11 بجے مرکزی سیکرٹریٹ تحریک منہاج القرآن کے بالمقابل پارک میں منعقد ہوگی۔ تقریب میں چیئرمین سپریم کونسل منہاج القرآن انٹرنیشنل ڈاکٹر حسن محی الدین قادری خصوصی شرکت کرینگے، منہاج القرآن، پاکستان عوامی تحریک کے مرکزی، صوبائی ،ضلعی رہنمائوں کے علاوہ صوبائی وزراء،ایم این ایز، ایم پی ایز، مذہبی، سیاسی ،سماجی رہنمائوں کی بڑی تعداد شرکت کرے گی، تقریب کے انتظامات کیلئے 15انتظامی کمیٹیاں تشکیل دی گئی ہیں جو کہ اجتماعی شادیوں سے متعلقہ جملہ معاملات و انتظامات کی نگرانی و رہنمائی کرینگی۔

تقریب میں آنے والے 2000 سے زائد مہمانوں کیلئے کھانے کا اہتمام بھی کیا جائے گا۔

(جاری ہے)

اسٹیج اور پنڈال کو خوبصورتی سے سجایا جائے گا، منہاج القرآن کے مرکزی رہنما آنے والے باراتیوں کو پھولوں کے ہار پہنا کر اور پھولوں کی پتیاں نچھاور کر کے خوش آمدید کہیں گے۔ باراتوں کی آمد کا سلسلہ صبح 10 بجے شروع ہو جائے گا،ہر نوبیاہتا جوڑے کو دو لاکھ سے زائد مالیت کا گھریلو سامان تحفے میں دیا جائے گا۔

منہاج القرآن علماء کونسل کے رہنما ہر جوڑے کا الگ الگ نکاح پڑھائیں گے، شادیوں کی اجتماعی تقریب میں 22مسلم اور ایک مسیحی جوڑا نئی زندگی کا آغاز کرے گا، مسیحی جوڑے کا نکاح ان کے رسم و رواج کے مطابق پادری صاحب پڑھائیں گے، منہاج القرآن ویمن لیگ دولہنوں اور ان کے ساتھ آنے والی خواتین کو خوش آمدید کہیں گی۔