9ماہ گزرنے کے بعد بھی حکومت 2لاکھ افرادی قوت بیرونِ ملک بھیجنے میں ناکام، بھارت نے 4لاکھ افراد کو قطر بھیج دیا

پی ٹی آئی حکومت نے 2لاکھ افراد کو قطر بھیجنے کا وعدہ کیا تھا لیکن تاحال قطر کے ساتھ نہ تو معاہدہ کیا جاسکا اور نہ ہی سہولت کاری کے لئے کوئی دفتر قائم نہیں کیا جا سکا ہے

Usman Khadim Kamboh عثمان خادم کمبوہ جمعرات مئی 23:02

9ماہ گزرنے کے بعد بھی حکومت 2لاکھ افرادی قوت بیرونِ ملک بھیجنے میں ناکام، ..
اسلام آباد(اردوپوائنٹ اخبار تازہ ترین۔16مئی2019ء) پاکستان تحریک انصاف کی حکومت کو قائم ہوئے 9 ماہ گزر گئے۔لیکن ابھی تک ملک سے 2 لاکھ ہنرمند افرادی قوت کو قطر سمیت دیگر دنیا کے کسی بھی ملک بھجوانے کا ٹاسک پورا نہ کیا جا سکا۔ذرائع کے مطابق وزارت برائے سمندر پار پاکستانیز نے کئی بار کیے جانے والے دعوؤں کے باوجود ابھی تک ایک بھی پاکستانی کو قطر نہیں بھجوایا جبکہ دوسری جانب گزشتہ4 ماہ کے دوران ہمسایہ ملک بھار ت 4 لاکھ ہنر مند افراد کوروزگار کے حصول کے لئے قطر بھیج چکاہے۔

وزارت سمندر پار پاکستانیز اور وزیراعظم کے مشیر زلفی بخاری نے وزارت کا قلمدان سنبھالتے ہوئے دعویٰ کیا تھا کہ ہنر مند پاکستانیوں کو روزگار کے حصول کے لئے قطربھجوایا جائے گا ،انہوں نے اس سلسلے میں قطر کے اندر ویزا سہولیات کی فراہمی کے دفاتر قائم کرنے کا بھی اعلان کیا تھا لیکن تاحال قطر میں ہنر مند افراد ی قوت کو بھجوانے کے سلسلے میں سہولت کاری کے لئے کوئی دفتر قائم نہیں کیا گیا ہے۔

(جاری ہے)

ذرائع نے بتایا کہ تحریک انصاف کی حکومت کے قیام کے فوراََ بعد وزیراعظم عمران خان نے اعلان کیا تھا کہ ملک کو قرضوں سے نجات دلانے اور بہتر معاشی پالیسیوں کیلئے بیرون ممالک میں رہائش پذیر تارکین وطن سرمایہ کاری کے لئے نہ صرف بڑھ چڑ کر حصہ لیں گے بلکہ زرمبادلہ کی صورت میں بھاری سرمایہ بھی پاکستان منتقل کریں گے۔ وزارت سمند پار پاکستانیز بھی اس ضمن میں کوئی تعمیری اور مثبت اقدام کرنے میں ناکام رہی ہے۔ ذرائع نے یہ بھی بتایا ہے کہ وزارت کے حکام پاکستانی ہنر مند افرا د کو قطر بھجوانے کے حوالے سے بھی قطر حکام کے ساتھ معاملات کو حتمی شکل نہیں دے سکے ۔