ایشیاء کپ پاکستان میں ہونے کے امکانات معدوم

کراچی(اردو پوائنٹ تازہ ترین اخبار۔21فروری2020ء ) کرکٹ ایشیاء کپ کی نیوٹرل وینیو پر منتقلی کے خدشات بڑھنے لگے جب کہ چیئرمین پی سی بی احسان مانی بھی اس حوالے سے عندیہ دے چکے ہیں۔کراچی میں میڈیا سے بات چیت کرتے ہوئے احسان مانی نے کہا تھا کہ موجودہ صورتحال میں بھارتی ٹیم کے آنے کی کوئی امید نہیں ہے، اگر ایشین کرکٹ کونسل پڑوسی ملک کے بغیر ہی ایونٹ کرانے کا فیصلہ کرلے تو الگ بات ہوگی، لیکن اگر بھارت کو شرکت کرنا ہے تو وینیو پاکستان کے بجائے کوئی اور ہوگا۔

(جاری ہے)

ہمیں اس چیز کا بھی خیال رکھنا ہے کہ ایسوسی ایٹ ٹیموں کی آمدن متاثر نہ ہو،اس سے واضح ہے کہ نیوٹرل وینیو کی ضرورت ہوگی۔یاد رہے کہ بنگلادیشی ٹیم کی آمد کے وقت یہی کہا گیا تھا کہ ڈیل کے نتیجے میں ایشیا کپ وہاں منتقل کردیا جائے گا البتہ پی سی بی اس تاثر کو مسترد کر چکا ہے۔واضح رہے کہ 2018 ء میں بھارت میں شیڈول ایشیاء کپ میں پاکستان نے سکیورٹی وجوہات کی بنا پرشرکت سے انکارکردیا تھا جس کے بعد اسے متحدہ عرب امارات کے نیوٹرل میدانوں میں کروانا پڑا تھا۔