مصر میں قتل کی انتہائی انوکھی واردات سامنے آ گئی

خاوند نے بیوی کو قتل کیا، بیٹا اس دوران ویڈیو بناتا رہا

محمد عرفان بدھ 26 فروری 2020 11:43

مصر میں قتل کی انتہائی انوکھی واردات سامنے آ گئی

قاہرہ(اُردو پوائنٹ تازہ ترین اخبار۔ 26فروری 2020ء) آئے روز دُنیا میں ناقابل یقین اور رونگٹے کھڑے کر دینے والے واقعات پیش آتے رہتے ہیں، جن پر پہلے تو یقین ہی نہیں آتا مگر پھر مان ہی لینا پڑتا ہے کیونکہ انسانی کی فطرت میں حیوانیت اور سفاکی کا عنصر بھی پایا جاتا ہے۔ مصر میں ایک ایسا واقعہ پیش آیا ہے جس نے سب کو دہلا کر رکھ دیا ہے۔ اُردو نیوز کے مطابق الدقھلیہ صوبے میں قتل کی ایک واردات اس طرح پیش آئی جیسے کوئی ٹی وی سیریل ہو۔

تفصیلات کے مطابق الدقھلیہ کی پولیس کو طلخا تحصیل میں واقع ایک مکان سے ایک خاتون عبیر کی لاش ملی تھی۔اس واقعے کی رپورٹ عبیر نامی خاتون کے بھائی نے درج کرائی تھی۔ابتدائی معائنے سے پتہ چلا کہ موت طبعی نہیں۔ عبیر کے چہرے اور گردن پر نیلے نشانات نظر آرہے تھے۔

(جاری ہے)

نکسیرپھوٹنے کے نشانات بھی واضح تھے۔ گھر کے دروازے اور کھڑکیاں صحیح سلامت تھیں۔

منظر نامہ ظاہر کرتا تھا کہ خاتون پر کسی باہر سے آنے والے شخص نے تشدد نہیں کیا۔ جو کچھ ہوا ہے وہ گھر کے اندر ہی ہوا ہے۔یہ پُراسرار موت ایک معمہ بن چکی تھی۔ اعلیٰ پولیس تفتیشی افسران ا پنے تمام تر تجربے کے باوجود اس گُتھی کو سلجھانے میں ناکام ہو چکے تھے۔ مقتولہ خاتون کا خاوند بھی صدمے سے نڈھال ہوا پڑا تھا۔تاہم اس قتل سے متعلق راز اس وقت فاش ہوا جب مقتولہ کے بیٹے نے پولیس ٹیم کے رُوبرو انکشاف کر ڈالا کہ اس کی والدہ کو کسی اور نے نہیں، بلکہ خود اس کے والد نے قتل کیا ہے۔

پولیس والوں کو اس کی بات پر تھوڑا یقین آیا تھا، مگر 9 سالہ بچے نے انہیں یہ بتا کر حیران کر دیا کہ جب اُس کی والدہ کو والد کی جانب سے تشدد کا نشانہ بنایا جا رہا تھا، تو اس نے چھُپ کر اس لرزہ خیز واردات کی ویڈیو بنا لی تھی۔ جو اس کے موبائل میں موجود ہے۔ بیٹے نے اپنے پاس موجود موبائل میں محفوظ رکھی یہ ویڈیو کلپ پولیس کو دکھا دی۔اس طرح پولیس کے ہاتھ ایک ناقابل تردید ثبوت سامنے آگیا اور اپنی بیوی کو قتل کر کے انتہا ئی صدمے کا ڈراما رچانے والے سفاک خاوند کو گرفتار کر لیا گیا۔ جس نے اپنے اس سنگین جُرم کا اعتراف کر لیا ہے۔