چین کے دورے سے واپس آئے منگولیا کے صدر کو اپنے ہی ملک میں تنہا کردیا گیا

صدرخلتماگین بٹولگا کو وفد سمیت ہسپتال کے آئسولیشن وارڈ میں منتقل کردیا گیا، وہ وفد کے ہمراہ چین کے دورے سے لوٹے تھے

اسامہ چوہدری اتوار 1 مارچ 2020 16:13

اولان باتور (اردو پوائنٹ اخبار تازہ ترین 1 مارچ 2020) : چین کے دورے سے واپس آئے منگولیا کے صدر کو اپنے ہی ملک میں تنہا کردیا گیا۔ غیر ملکی خبر رساں ادارے کا کہنا ہے کہ صدرخلتماگین بٹولگا کو وفد سمیت ہسپتال کے آئسولیشن وارڈ میں منتقل کردیا گیا، وہ وفد کے ہمراہ چین کے دورے سے لوٹے تھے۔ بتایا گیا ہے کہ منگولیا کے صدر نے اپنے دورہ چین میں صدر شی جنگ پن سے ملاقات کی، دونوں نے آپس میں کرونا وائرس سے متعلق بات چیت کی۔

واضع رہے کہ کرونا وائرس کے باوجود بھی منگولین صدرخلتماگین بٹولگا نے اپنا چین کا دورہ منسوخ نہیں کیا تھا تاہم اس وقت ہی فیصلہ کرلیا گیا تھا کہ وطن واپسی پر صدر اور وفد کو حفاظتی تدابیر کے تحت 14 دن کیلیے آئسولیشن میں رکھا جائے اور ضروری ٹیسٹس بھی کروائے جائیں۔

(جاری ہے)

دوسری جانب چین میں کورونا وائرس نے مزید 47 افراد کی جان لے لی، جس کے بعد چین میں اس وائرس سے اموات کی مجموعی تعداد 2 ہزار 835 ہو گئی ہے جبکہ اٹلی میں کورونا وائرس سے ہلاکتوں کی تعداد 17 ہو گئی۔

میڈیارپورٹس کے مطابق چین میں کورونا وائرس کے مزید 427 کیسز سامنے آئے ہیں جس کے بعد متاثرین کی مجموعی تعداد 79 ہزار 251 ہو گئی ہے۔ جنوبی کوریا میں کورونا وائرس کے 594 نئے کیسز سامنے آنے کے بعد، مجموعی تعداد 2 ہزار 931 ہو گئی ہے۔اٹلی میں کورونا وائرس سے 17 اموات رپورٹ ہوئی ہیں اور وائرس سے متاثرہ 650 کیسز سامنے آ چکے ہیں، جس کے بعد امریکا نے شہریوں کو اٹلی کا غیر ضروری سفر نہ کرنے کی ہدایات جاری کر دی ہیں۔

اقوامِ متحدہ کے سیکریٹری جنرل انتونیو گوتریس نے وزراء اور مندوبین کو آئندہ ماہ نیو یارک میں اجلاس ملتوی کرنے کی تجویز دی ہے۔ نیویارک میں یو این کمیشن آن اسٹیٹس آف ویمن کا اجلاس 9 مارچ سے 20 مارچ تک ہونا شیڈولڈ ہے جس میں تقریباً 7 ہزار سے زائد افراد شریک ہوتے ہیں۔عالمی ادارہ صحت کا کہنا تھا کہ فوری ایکشن ہی بیماری کو پھیلنے سے روک سکتا ہے، کورونا وائرس کے کیسز چین کے علاوہ دیگر ممالک میں بھی سامنے آرہے ہیں۔ادھر جاپانی وزیرِ اعظم نے پبلک اسکولوں کی عارضی بندش کا اعلان کیا ہے، انہوں نے اس حوالے سے کہا کہ جاپان بھر میں اسکول 2 مارچ سے اسپرنگ بریک تک بند رہیں گے۔